მთაწმინდის რაიონის გამგეობის დაკვეთით, ვერაზე, შენგელიას ქ. N22-ში გრუნტის დამჭერი კედლის მშენებლობა მიმდინარეობს.
პროექტის შედეგად, მოეწყობა საყრდენი კედელი და დამცავი ღობე, რომელიც მიმდებარე სახლებს გრუნტის ჩამოშლისაგან დაიცავს.
მიმდინარე სამუშაო პროცესს მთაწმინდის რაიონის გამგებელი დავით კირკიტაძე გამგეობის თანამშრომლებთან ერთად გაეცნო.
„აღნიშნულ მისამართზე ფერდობი იშლებოდა და აუცილებელი გახდა გრუნტის დამჭერი კედლის მშენებლობა. სამუშაოების დასრულების შემდეგ, მიწის ჩამოშლისგან სავალი გზაც დაცული იქნება და ადგილობრივი მოსახლეობაც. მსგავსი პროექტების განხორციელებას მიმდინარე წელსაც გავაგრძელებთ“, - განაცხადა დავით კირკიტაძემ.
ინფრასტრუქტურულ პროექტს, კონტრაქტორი კომპანია შპს „ინსტალ+“ ასრულებს და ადგილობრივი ბიუჯეტიდან 320 000 ლარია გამოყოფილი.
მსგავსი პრობლემის გამო, გამგეობა რაიონში კიდევ ორი გრუნტის დამჭერი კედლის მშენებლობას ახორციელებს.
