საქართველოს ეროვნული ბოტანიკური ბაღი, იაპონურ ბაღში, ვანდალიზმის ფაქტის შესახებ განცხადებას აკეთებს:
"დაუდგენელმა პირებმა ბოტანიკურ ბაღში არსებული იაპონური ბაღის ახლად აღდგენილი მცირე არქიტექტურული ფორმები დააზიანეს!
იაპონურ ბაღში ქ. თბილისის მერიის, საქართველოში იაპონიის საელჩოს მხარდაჭერითა და პარტნიორობით აღდგენის სამუშაოები სულ რამდენიმე დღის წინ დასრულდა.
აღდგენის პროექტი მსოფლიოში ცნობილმა იაპონურმა ლანდშაფტურმა კომპანიამ ‘’კოსუგიმ’’ შეიმუშავა საქართველს ეროვნული ბოტანიკური ბაღის მიმართვის საფუძველზე და განახორციელა ბოტანიკური ბაღის სპეციალისტებთან ერთად.
მსოფლიოში აღიარებული ტრადიციული იაპონური საბაღე ხელოვნების ნიმუში საქართველოს ეროვნული ბოტანიკური ბაღის ერთ-ერთი ღირსშესანიშნაობაა, რომელიც გახსნის დღიდან ასრულებს იაპონიის კულტურის სიმბოლოს როლს.
საქართველოს ეროვნული ბოტანიკური ბაღი უკიდურეს შეშფოთებას გამოხატავს და გმობს ბაღის ტერიტორიაზე იაპონური ბაღის სარეაბილიტაციო სამუშაოების დასრულებისთანავე გარკვეული პირების მიერ არქიტექტურული ნაგებობის დაზიანებას.
თანამოქალაქეებს მივმართავთ თხოვნით, გაითვალისწინონ, რომ იაპონურ ბაღში და საქართველოს ეროვნული ბოტანიკური ბაღის მთლიან ტერიტორიაზე, ტურისტულად დატვირთულ ადგილებსა და საკოლექციო ნაკვეთებზე დამონტაჟებულია ვიდეო-მონიტორინგის კამერები.
იდენტიფიცირების შემთვევაში, ვანდალიზმის ფაქტის ჩამდენ პირს დაეკისრება კანონით გათვალისწინებული პასუხისმგებლობა."
