,
17, 18 და 19 ნოემბერს ექსპო ჯორჯიაში, კვების მრეწველობის გამოფენაზე ახალი ქართული სწრაფი კვების ბრენდის Kusa Food Balls-ის პრეზენტაცია გაიმარტა. თუმცა ეს Kusa Food Balls-ის პირველი გამოსვლა არ იყო საზოგადოების წინაშე, ცოტა ხნის წინ, იგი დედა ენის ბაღში გამართულ სთრიტ ფუდ ფესტივალზეც იყო წარმოდგენილი.
კომპანია Business Insider Georgia-ს დამფუძნებელის, გიორგი მორდეხაშვილის განცხადებით Kusa Food Balls-ი მომხმარებლებს მჭადის საბეჭდი მანქანით დამზადებულ მჭადის სეტებს შესთავაზებს
„ქართული ფასტფუდის კონცეფციის იდეა 15 წლის გაჩნდა. შემდეგ კი მოვიფიქრე ტექნოლოგია, რომლითაც შესაძლებელია საკვები ბურთულების მასობრივი წარმოება. 6 თვის წინ ამ იდეის რეალიზაცია დავიწყე. გავაკეთე წარმოება, სადაც ნახევარფაბრიკატებს ვამზადებთ და უკვე ვემზადებით ქართული ფასტ ფუდის გაყიდვის მიზნით თბილისში წერტილების გასახსნელად“, - ამბობს გიორგი მორდეხაშვილი.
როგორც Kusa Food Balls-ის დამფუძნებელი ამბობს, ქართული ფასტ ფუდის წარმოება სამომავლოდ მასშტაბური გახდება.
„შეგვიძლია დღეში 20 ათასამდე ბურთულა ვაწარმოოთ. ეტაპობრივად გავზრდით წარმოებას. შესაძლებელი გახდება პროდუქციის უცხოეთში გატანაც. ჯერ რა თქმა უნდა წარმოების განვითარება ადგილობრივი ბაზრიდან უნდა დავიწყოთ“, - ამბობს მორდეხაშვილი.
მისი თქმით, ეს კონცეფცია, ზუსტად იმ სტანდარტებით არის დაგეგმილი, რომელსაც უცხოური ცნობილი ბრენდები იყენებენ. ერთი სეტის საფასური კი, რომელშიც 6 ბურთულა შევა, საშუალოდ 8-12 ლარი იქნება.
ამ ეტაპზე კომპანია 9 დასახელების პროდუქტს თავაზობს მომხმარებელს
„ვფიქრობ, რომ ქართული ფასტ ფუდის კონცეფცია ძალიან წარმატებული იქნება. აქამდე ეს ნიშა თავისუფალი იყო, რადგან ამ სეგმენტში ძირითადად უცხოეური ბრენდები არიან წარმოდგენილი. პროდუქტი ინოვაციურია და ვინც დააგემოვნა ყველას მოსწონს. დღეს გვაქვს ცხრა სახის ბურთულა. საბოლოო ჯამში წარმოებაში 16-ს ჩავუშვებთ“, - ამბობს გიორგი მორდეხაშვილი.
მისივე განცხადებით ხელოვნურ ინტელექტის დახმარებით კუსას დესერტების ხაზის შექმნის პროცესიც სრული დატვირთვით მიმდინარეობს.
გიორგი კმაყოფილია მისი ბრენდის პირველი ნაბიჯებით და ამის შესახებ საკუთარ სოციალურ ქსელში წერს:
„ერთი, ბევრისთვის სასიამოვნო მოულოდნელობა დაფიქსირდა გამოფენის დღეებში.
მშობლები განცვიფრებულები აღნიშნავდნენ, რომ ბავშვები, რომლებიც კატეგორიულად არ ჭამდნენ სახლში მჭადს და ყველს, კუსას ყველიან ბურთულებს არა მხოლოდ სიამოვნებით მიირთმევდნენ, არამედ მშობლებს დამატებას სთხოვდნენ და ჩვენს სტენდთან აბრუნებდნენ. დიდი ალბათობით ეს ის შემთხვევაა, როდესაც გემოსთან ერთად მიწოდების ფორმატი იძენს ძალზედ მნიშნელოვან, შესაძლოა გადამწყვეტ ფუნქციას.
აღარ ვსაუბრობ ახალგაზრდებზე, რომლებიც ისედაც სიამოვნებით ყიდულობდნენ ჩვენს ბურთულებს ჯერ კიდევ დედა ენის ბაღში გამართულ სტრიტ ფუდ ფესტივალზე.
სხვათა შორის, როდესაც ნახევარი წლის წინ იდეაზე მუშაობა დავიწყეთ, ბაზრის საკმაოდ სერიოზული კვლევა ჩავატარეთ სხვადასხვა ასაკობრივ ფოკუს ჯგუფებში. სწორედ იმ დროიდან ჩამრჩა საკმაოდ მკვეთრად 14-18 წლის ასაკობრივი ჯგუფიდან რამოდენიმე ახალგაზრდის პასუხი, რომელიც დაახლოებით ასე ჟღერდა. “თუ ქართული ფასტ ფუდის ფორმატი კონცეპტუალურად ისეთივე მიმზიდველი იქნება, როგორიც უცხოურია. ამასთან კერძებს ექნებათ ჩვეული ქართული გემოები, ისინი უპირატესობას ქართულ, ეროვნულ ფასტ ფუდს მიანიჭებენ”.
ვფიქრობ ბავშვების უჩვეულო ქცევამ და ახალგაზრდების მიერ დედა ენის ბაღში გამოვლენილმა მაღალმა აქტივობამ ნაწილობრივ უკვე დაადასტურა კვლევის შედეგების მართებულობა.“
კომპანიის დამფუძნებლის ინფორმაციით, პირველ ეტაპზე თბილისში Kusa Food Balls-ის 40-მდე წერტილი გაიხსნება, შემდეგ კი კომპანია რეგიონებშიც გავა, ხოლო შემდეგ ნაბიჯად საერთაშორისო ბაზრებზე გასვლა იგეგმება.
იმედია ახალი ბრენდი წარმატებული გახდება ქართულ ბაზარზე და შემდგომ უკვე, ღირსეულ ადგილს დაიკავებს მსოფლიო ფასტ ფუდის გიგანტებს შორის.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
