,
ევროპულმა სამაუწყებლო კომპანიამ „ევრონიუსმა“ (Euronews - მთავარი ოფისი ლიონში, საფრანგეთი) გერმანულ ენაზე ეთერში გაუშვა ვიდეოსიუჟეტი სათაურით „შიშისა და ბიზნესის ურთიერთქმედება: იარაღის ბუმი საქართველოში“.
გთავაზობთ ვიდეოსიუჟეტის ტექსტს:
უკრაინაში ომის დაწყების შემდეგ საქართველოში იარაღის მიმართ ინტერესი გაიზარდა. როგორც ცეცხლსასროლი იარაღის დისტრიბუტორები აცხადებენ, ეს ერთგვარად ემოციური ფონით იყო გამოწვეული. მოქალაქეები ფიქრობდნენ, რომ კონფლიქტის საქართველოში განახლების შემთხვევაში თავდაცვისათვის იარაღი აუცილებლად დასჭირდებოდათ. რამდენიმე თვეში მძაფრი ემოცია განელდა და იარაღზე მოთხოვნამაც იკლო, თუმცა ბოლომდე არ გამქრალა.
იარაღის მაღაზიებში თითქმის ყველა კატეგორიის ადამიანს შეხვდებით. ხშირად ისეთი ადამიანები ინტერესდებიან, რომელთაც ადრე იარაღთან არანაირი შეხება არ ჰქონიათ. ასეთ დროს მნიშვნელოვანია, რომ სანამ ადამიანი იარაღის ყიდვას გადაწყვეტს, მას სრულად გააზრებული უნდა ჰქონდეს მისი დანიშნულება და უსაფრთხოების წესები. ასევე აუცილებელია ისიც, რომ იარაღით დაინტერესებული პირი დეტალურად გაეცნოს კანონში „იარაღის შესახებ“ შეტანილ ცვლილებებს, რომლებიც მიმდინარე წლის პირველი აგვისტოდან ამოქმედდა.
როგორც კანონში წერია, გრძელლულიანი ხრახნიანი სანადირო თოფები სავალდებულო ბალისტიკურ შემოწმებას ექვემდებარება. როგორც შინაგან საქმეთა სამინისტროში აცხადებენ, ცვლილების მიზანი იარაღზე კონტროლის მეშვეობით დანაშაულის პრევენციაა. მსროლელებს კი ეს ცვლილება არ მოსწონთ და აცხადებენ, რომ გრძელლულიანი იარაღის შემოწმება იმ ფორმით, რა ფორმითაც შინაგან საქმეთა სამინისტრო წარმართავს, ძვირადღირებული იარაღის დაზიანებას გამოიწვევს, ასევე შემმოწმებლის უსაფრთხოებასაც შეუქმნის პრობლემებს.
პრეციზიული სროლის ფედერაცია ასევე პრობლემას ხედავს სასროლეთთან დაკავშირებითაც. ამ დრომდე საქართველოში არცერთი ლიცენზირებული ღია სასროლეთი არ არსებობს. როგორც მსროლელები ამბობენ, კანონის მიხედვით, მიზანში სროლა დაშვებულია მხოლოდ სროლისთვის გამოყოფილ ადგილას, თუმცა სასროლეთების გარდა რომელი ადგილები გამოდგება საამისოდ, ამას კანონი არ აკონკრეტებს. ამის გამო წარმოიქმნება გაუგებრობა მსროლელებს შორის, მათთვის ბოლომდე ნათელი არ არის, კანონიერია თუ არა მიზანში სროლა და ვარჯიში მინდორში ან ტყეში, დაცულ და უსაფრთხო ადგილას მაშინ, როდესაც ასეთ ადგილებში ნადირობის მიზნით სროლა ნებადართულია.
ამ ეტაპზე პრეციზიული სროლის ფედერაცია ვარჯიშებსა და შეჯიბრებებს დასახლებული პუნქტებიდან შორს, ბუნებრივად დაცულ ადგილებში, უსაფრთხოების წესების დაცვით ატარებს. როგორც იარაღის მოყვარულები აღნიშნავენ, უსაფრთხოება უმთავრესია.
წყარო: https://de.euronews.com/2023/09/19/die-angst-befeuert-die-geschafte-waffenboom-in-georgien
მოამზადა სიმონ კილაძემ
თბილისის მერია გადასასვლელ ხიდთან, ცოტნე დადიანისა და სადგურის მოედნის დამაკავშირებელი ესტაკადის მშენებლობას გეგმავს. ახალი ინფრასტრუქტურული პროექტი 2026 წლის ბიუჯეტში უკვე გათვალისწინებულია და მასზე მომდევნო წელს 10 მილიონი ლარი დაიხარჯება, 2027 წელს კი დამატებით 87.5 მილიონი ლარი. მთლიანობაში 280-მეტრიანი ესტაკადის პროექტირება-მშენებლობის წინასწარი სავარაუდო ღირებულება 100 მილიონ ლარს შეადგენს. პროექტზე საგზაო მარშრუტის კვლევაზე 2025 წელს უკვე 2.5 მილიონი ლარი დაიხარჯა.
2026 წლის ბიუჯეტის განმარტებით ბარათში მითითებულია, რომ სარკინიგზო მაგისტრალი ქალაქის ცენტრალურ მონაკვეთს ყოფს იმგვარად, რომ მოედნის პარალელურად არსებულ ქუჩებს შორის დაკავშირებადობა მინიმალურია და აუცილებელია საზოგადოებრივი ტრანსპორტისთვის ახალი ინფრასტრუქტურის შექმნით ქალაქის უბნების დაკავშირებადობა გაუმჯობესდეს.
"ქალაქ თბილისის ცენტრში არსებული რკინიგზის კორიდორი და თანმდევი ინფრასტრუქტურა ქმნის 4-კილომეტრიან მონაკვეთს აღმოსავლეთ-დასავლეთ სატრანსპორტო კავშირის გარეშე, გარდა შეზღუდული რაოდენობის საფეხმავლო კავშირებისა. ეს ისტორიული დაბრკოლება ხელს უშლის თბილისის სატრანსპორტო გეგმის პრიორიტეტებისკენ მისწრაფებას. სადგურის მოედანი მდებარეობს აღნიშნულ ამ 4-კილომეტრიან მონაკვეთში. ის წარმოადგენს დედაქალაქის უმნიშვნელოვანეს სატრანსპორტო „ჰაბს“, სადაც თავს იყრის 61 ავტობუსის მარშრუტი, მეტროს 2 ხაზი, ისევე როგორც საქართველოს რკინიგზის სერვისები. ტერიტორია ემსახურება საათში 330 ავტობუსის სერვისს, საიდანაც მომავალში 150 გამოიყენებს ხიდს. თბილისის სატრანსპორტო გეგმის თანახმად, სადგურის მოედანი ასევე იქნება თბილისის საგარეუბნო რკინიგზის სერვისების თავმოყრის წერტილი, რაც კიდევ უფრო მნიშვნელოვანს გახდის მისი, როგორც სატრანსპორტო ჰაბის ფუნქციას. ამჟამინდელი მდგომარეობით, აღმოსავლეთ-დასავლეთ კავშირის არარსებობა აფერხებს მაღალი ხარისხის ჰაბის განვითარებას, ხშირად 22 ავტობუსის მარშრუტის შეწყვეტა ხდება ვადაზე ადრე ან ახორციელებენ 1.5 კილომეტრიანი შემოვლითი მგზავრობას, რომელიც მნიშვნელოვნად ზრდის გადაადგილების დროს, ჰაერის დაბინძურებასა და ვიბრაციას, ისევე როგორც ამცირებს მარშრუტების ხარჯეფექტიანობას. თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევამ, რომელიც მსოფლიო ბანკის დახმარებით ჩატარდა, მულტიკრიტერიუმიანი ანალიზის საშუალებით, გამოავლინა თბილისის ცენტრში არსებული რკინიგზის ხაზის ორ მხარეს (აღმოსავლეთ და დასავლეთ) შორის ახალი კავშირის შექმნის საუკეთესო ალტერნატივა - საზოგადოებრივი ტრანსპორტის პრიორიტეტის მქონე საავტომობილო ხიდი, დადიანის ქუჩასა და სადგურის მოედანს შორის. ქ. თბილისის მუნიციპალიტეტის მერია ფლობს თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევის საფუძველზე შექმნილ ანგარიშს, კონცეფციას. პროექტის მიზანი არის, ამ კონცეფციით განსაზღვრული, საავტომობილო ხიდის მშენებლობა.
აღნიშნული ობიექტი წარმოადგენს საავტომობილო ხიდს ქალაქ თბილისში, რომელიც დააკავშირებს სადგურის მოედანს დადიანის ქუჩასთან და იქნება 280 მეტრი სიგრძის, 8.5 მეტრი სიგანის სწორ მონაკვეთში, ხოლო 15 მეტრი სიგანის მოხვევის მონაკვეთში (ე.წ. სპირალი, რომელიც ეშვება სადგურის მოედანზე). ხიდი იქნება ორზოლიანი და დასავლეთით, სადგურის მოედანზე დაშვებისას, რამპას ექნება მარჯვნივ ჩამხვევი ზოლი. რკინიგზის დერეფნის კვეთისას აუცილებელია 7 მეტრიანი სხვაობა რკინიგზის ლიანდაგსა და ხიდის სტრუქტურას შორის. საავტომობილო ხიდი ითვალისწინებს 18 მეტრიანი ავტობუსების მართვის ტრაექტორიებს, მისი მაქსიმალური გრძივი ქანობი - 10.7%, ხოლო მინიმალური რადიუსი - 12 მეტრი. საავტომობილო ხიდის გამტარობა შერეული ნაკადების პირობაში იქნება 800 ავტომობილი ერთ საათში ერთი მიმართულებით", - ნათქვამია 2026 წლის ბიუჯეტის განმარტებით ბარათში.
წყარო: https://bm.ge
