ევროკავშირის სამაუწყებლო კომპანია „ევრონიუსმა“ (Euronews - ცენტრალური ოფისი ლიონში, საფრანგეთი) ეთერში გადასცა ვიდეოსიუჟეტი სათაურით „დანაკარგები საგრძნობია“: საქართველოში ზაფხულის სეზონი ისრაელიდან ტურისტების გარეშე დაიწყო“, რომელშიც გადმოცემულია მიმდინარე წლის ტურიზმის პერსპექტივები.

გთავაზობთ პუბლიკაციას შემოკლებით:

საქართველოში საზაფხულო დასვენების სეზონი დაიწყო, მაგრამ ტურისტების მნიშვნელოვანი რაოდენობა არ არის - განსაკუთრებით ისრაელიდან. ისრაელისა და „ჰამასის“ ომმა ღაზას სექტორში საქმე იქამდე მიიყვანა, რომ ისრაელელი ტურისტები მსოფლიოში ნაკლებად მოგზაურობენ. ეს შემცირება საქართველოზეც აისახა: „დანაკარგები საგრძნობია. ახლო აღმოსავლეთში შექმნილმა დაძაბულმა სიტუაციამ ისრაელიდან ტურისტების რაოდენობაზე ნეგატიურად იმოქმედა“, - ამბობს ლევან გიორგაძე, Tbilisi Free Walking Tours-ის დამფუძნებელი, - „გასულ წელთან შედარებით ისრაელიდან ჩამოსული ტურისტების რიცხვი მნიშვნელოვნად შემცირდა. მე არ ვიტყოდი, რომ ისინი საერთოდ არ არიან, მაგრამ არიან ნაკლები რაოდენობით“.

საქართველოს დედაქალაქი თბილისი ტურისტებისათვის მთელი წლის განმავლობაში პოპულარულია, ხოლო შავი ზღვის პლაჟები ზაფხულის სეზონში დამსვენებლებისათვის მიმზიდველია.

შოთა ბურჯანაძე, ქართველი რესტორატორების ასოციაციის თაბმჯდომარე, ანალოგიურ შეშფოთებას ამჟღავნებს: „ტურისტებს ძირითადად აზიის, სპარსეთის ყურისა და ევროპის ქვეყნებიდან ველოდით. ევროპის ქვეყნები თითქმის საერთო რაოდენობის 5%-ამდე ჩამოვიდა. დღეს ტურისტული მოლოდინი აჭარის მიმართულებით რჩება და ჩვენს მეზობელ ქვეყნებს, თურქეთს, სომხეთსა და რუსეთს უკავშირდება. საერთოდ, ჩემი აზრით, მიმდინარე წელი ჩვენს მოლოდინებს არ ამართლებს... ჯავშნები გაუქმებულია, ახალი შეკვეთები კი ძალიან ცოტაა“.

მაგრამ ასეთ დასკვნას ყველა არ ეთანხმება.

„იმის გათვალისწინებით, რომ 2024 წლის პირველი კვარტლის მონაცემი ძალიან პოზიტიური იყო როგორც შემოსავლების, ისე ტურისტების რაოდენობის თვალსაზრისით, ეს შედეგი იძლევა შესაძლებლობას, რომ გვქონდეს მოლოდინი და ვივარაუდოთ, რომ მეორე კვარტალი, მთლიანად ზაფხულის სეზონი და ზოგადად, წლის ბოლომდე ტენდენცია ტურიზმის ინდუსტრიაში ძალიან პოზიტიური იქნება“, – ამბობს მაია ომიაძე.

საქართველოს სტატისტიკის სამსახურის 2023 წლის ანგარიშის მიხედვით, გასულ წელს საქართველოში ვიზიტორების ყველაზე დიდი რაოდენობა, 1.2 მილიონი, რუსეთიდან ჩამოვიდა. შარშან მეორე ადგილს თურქეთი, მესამეს კი, სომხეთი იკავებდა. 2024 წლის პირველი კვარტლის მონაცემებით, ვიზიტორთა პირველ სამეულში კვლავ თურქეთი, რუსეთი და სომხეთი რჩებიან.

წყარო: https://www.euronews.com/travel/2024/06/25/the-loss-is-noticeable-georgias-summer-season-hit-by-lack-of-israeli-tourists