USD 2.7585
EUR 2.9910
RUB 3.0337
თბილისი
უორენ ბაფეტის რჩევები ინვესტორებს, მთავრობებს და ბიზნესმენებს
თარიღი:  342

უოლ-სტრიტის ყურადღების ცენტრში პლანეტის ყველაზე წარმატებული საინვესტიციო ჰოლდინგი Berkshire Hathaway და მისი ლეგენდარული ხელმძღვანელი უორენ ბაფეტია.

მიმდინარე კვირას Berkshire-მა ფინანსური შედეგები გაასაჯაროვა, საიდანაც ირკვევა, რომ 2022 წელს ჰოლდინგმა 30.8 მილიარდი დოლარის საოპერაციო მოგება მიიღო, თუმცა ფისკალური წელი $23-მილიარდიანი ზარალით დაასრულა, რაც საინვესტიციო პორტფელის ღირებულების შემცირებით იყო განპირობებული.

ფინანსური შედეგების გარდა, მსოფლიოს ყურადღება უორენ ბაფეტის ვრცელმა წერილმაც მიიქცია, რომელშიც „ომაჰელ ორაკულად“ წოდებულმა ინვესტორმა არაერთ საკვანძო საკითხზე ისაუბრა და საკუთარი პოზიციაც მკაფიოდ გამოხატა.

ბაფეტის შეფასებით, გასულ წელს საფონდო ბირჟასა და საფინანსო ბაზარზე განვითარებულ მოვლენებს რთულია ლოგიკური ან მოსალოდნელი ვუწოდოთ, მისი განცხადებით, ახლა ბირჟა უფრო შიზოფრენიულია, ვიდრე ოდესმე, რაც პანდემიით, ომით, რეკორდულად შემსუბუქებული და შემდეგ უკვე უსწრაფესად გამკაცრებული მონეტარული პოლიტიკითაა განპირობებული.

მისი მთავარი რჩევა ისევ უცვლელად რჩება: ინვესტორებს ნაკლები ფოკუსი უნდა ჰქონდეთ მოკლევადიან ფასების ცვლილებაზე და მეტი ყურადღება უნდა დაუთმონ ჭეშმარიტად კარგი ბიზნესების აღმოჩენას, რომელიც სარგებელს არა ერთ წელში, არამედ ხუთ ან ათ წელში მოიტანს.

გარდა ამისა, 92 წლის ინვესტორმა თავისი კარიერაც გაიხსენა და აღნიშნა, რომ მუდმივად წარმატების მიღწევა არათუ რთული, არამედ შეუძლებელია, უფრო მეტიც, ის რეალურ და დიდ წარმატებას ხუთ წელში მხოლოდ ერთხელ აღწევდა ხოლმე, თუმცა ეს მაინც საკმარისი აღმოჩნდა Berkshire-ის პლანეტის ყველაზე მსხვილ საინვესტიციო ჰოლდინგად გადასაქცევად.

ომაჰელი ორაკული თავის წერილში კიდევ ერთხელ შეეხო სწრაფი გამდიდრების არარეალისტურ სტრატეგიებს და აღნიშნა, რომ რეალური წარმატების მიღწევას თავდაუზოგავი შრომა და დიდი დრო სჭირდება. მოგეხსენებათ, ბაფეტმა პირველი მილიარდი არა თინეიჯერობის, არამედ 56 წლის ასაკში იშოვა.

Berkshire-ის თავმჯდომარე მსხვილი კომპანიების მიერ აქციების უკან გამოსყიდვის საკითხსაც შეეხო. მისი განცხადებით, ეს პრაქტიკა ლოგიკური, მორალური და ეკონომიკურად გამართლებულია, მისი გაკრიტიკება კი მხოლოდ იმაზე მიუთითებს, რომ ადამიანს საკმარისი ცოდნა და განათლება არ აქვს. ამ რეპლიკით ბაფეტმა აშშ-ის პრეზიდენტს, ჯო ბაიდენს მიმართა, რომელიც აქციების უკან გამოსყიდვის პრაქტიკის ხმამაღალი კრიტიკოსია. ზოგადად, საფონდო ბირჟიდან აქციების უკან გამოსყიდვის სტრატეგიას კომპანიები მაშინ მიმართავენ, როცა მათ მაღალი მოგება და თავისუფალი ფინანსური რესურსები აქვთ, ამ ქმედებით კომპანიის ინვესტორები უფრო მაღალ დივიდენდს, ანუ ფინანსურ სარგებელს იღებენ. ბაიდენის განცხადებით, კომპანიებმა თავიანთი რესურსები არა დივიდენდების გაზრდაზე, არამედ ახალი სამუშაო ადგილების შექმნაზე და ხელფასების გაზრდაზე უნდა დახარჯონ.

თავად Berkshire-მა გასულ წელს საფონდო ბირჟიდან 7.9 მილიარდი დოლარის აქციები გამოისყიდა. ბალანსზე ნაღდი ფულის მოცულობა კი კოლოსალურ 130 მილიარდ დოლარს აღწევს, რაც იმას ნიშნავს, რომ უორენ ბაფეტის კომპანიას საქართველოს მთლიან შიდა პროდუქტზე თითქმის 7-ჯერ მეტი თანხა აქვს.

გარდა ამ საკითხისა, ბაფეტმა კიდევ ერთხელ ისაუბრა პიროვნული თვისებების, კერძოდ, შრომისმოყვარეობის, დისციპლინისა და საქმეზე ფოკუსირების მნიშვნელობაზე. მისი თქმით, იმ 1,000-მდე კომპანიიდან, რომელთანაც შეხება Berkshire-ს ჰქონია, წარმატება მხოლოდ იმათ მიაღწიეს, რომელთაც სწორედ ამ თვისებების მქონე დირექტორები და მენეჯერები ხელმძღვანელობდნენ.

ცნობისთვის, Berkshire-ის საბაზრო კაპიტალიზაცია ამჟამად 671 მილიარდ დოლარს შეადგენს და ის მსოფლიოს რიგით მეექვსე ყველაზე ძვირად ღირებული კომპანიაა, უორენ ბაფეტი კი - ყველა დროის ყველაზე წარმატებული ინვესტორი, რომლის ქონებასაც ფორბსი 106 მილიარდ დოლარად აფასებს.

ბიზნესი
რას წარმოადგენს ამერიკული BlackRock-ი, რომელიც $10.5 ტრილიონის აქტივებს მართავს?

გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.

ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.

რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?

2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.

აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:

#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)

#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)

#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)

#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)

#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)

#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)

#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)

#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)

#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)

#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)

წყარო:https://bm.ge/

სრულად
გამოკითხვა
ვინ გაიმარჯვებს რუსეთ - უკრაინის ომში?
ხმის მიცემა
სხვათა შორის

მსოფლიოს ისტორიაში, უდიდესი იმპერიები ტერიტორიით(მლნ კვ. კმ): ბრიტანეთი - 35.5 მონღოლეთი - 24.0 რუსეთი - 22.8 ქინგის დინასტია (ჩინეთი) - 14.7 ესპანეთი - 13.7 ხანის დინასტია (ჩინეთი) - 12.5 საფრანგეთი - 11.5 არაბეთი - 11.1 იუანების დინასტია (ჩინეთი) - 11.0 ხიონგნუ - 9.0 ბრაზილია - 8.337 იაპონია - ~8.0 იბერიული კავშირი - 7.1 მინგის დინასტია (ჩინეთი) - 6.5 რაშიდუნების ხალიფატი (არაბეთი) - 6.4 პირველი თურქული სახანო - 6.0 ოქროს ურდო - 6.0 აქემენიანთა ირანი - 5.5 პორტუგალია - 5.5 ტანგის დინასტია (ჩინეთი) - 5.4 მაკედონია - 5.2 ოსმალეთი - 5.2 ჩრდილო იუანის დინასტია (მონღოლეთი) - 5.0 რომის იმპერია - 5.0

Ford, საავტომობილო ბაზრის დომინანტი მაშინ, როდესაც საავტომობილო ბაზარი ჯერ კიდევ ჩამოყალიბების პროცესში იყო, Ford Model T იყო დომინანტი მანქანა. 1916 წლის მონაცემებით, ის მსოფლიოში ყველა ავტომობილის 55%-ს შეადგენდა.

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.