უნგრეთს შეუძლია მოხსნას უკრაინის სახსრებზე ვეტო, თუ EU მთელ გაყინულ თანხებს განბლოკავს

дата:

უნგრეთის პრემიერმინისტრის, ვიქტორ ორბანის პოლიტიკური მრჩეველი ბალაშ ორბანი აცხადებს, რომ ბუდაპეშტი მზადაა გააუქმოს თავისი ვეტო უკრაინისადმი ევროკავშირის დახმარების ახალ პაკეტზე, თუ ბრიუსელი დათანხმდება თანხების განბლოკვას, რომლებიც გაყინულია უნგრეთში კანონის უზენაესობის შესახებ შეშფოთების ფონზე.

ევროპელი ლიდერები კვირის ბოლოს, სამიტზე აპირებენ ისტორიული გადაწყვეტილებების მიღებას უკრაინასთან გაწევრიანების მოლაპარაკებების გახსნისა და 50 მილიარდი ევროს, ოთხწლიანი დახმარების პაკეტის მიწოდების შესახებ. "პოლიტიკო" წერს, რომ პირველ რიგში, მათ უნდა გადალახონ უნგრეთის წინააღმდეგობები ორივე თემაზე.

"უნგრეთის ევროკავშირის და უკრაინის დაფინანსება ორი განსხვავებული საკითხია. მაგრამ თუ ევროკავშირი დაჟინებით მოითხოვს, რომ უკრაინის დაფინანსება ევროკავშირის შესწორებული ბიუჯეტიდან უნდა მოხდეს, მაშინ ეს ორი საკითხი ერთმანეთს უკავშირდება", - უთხრა ბალაშ ორბანმა "ბლუმბერგს" სამშაბათს.

უნგრეთის ლიდერის თანაშემწის კომენტარი კეთდება მას შემდეგ, რაც ევროკომისია აპირებს განბლოკოს ევროკავშირის 10 მილიარდი ევროს დაფინანსება, როგორც ჯილდო სასამართლო რეფორმებისთვის, რომელიც ბუდაპეშტმა განახორციელა სასამართლოს დამოუკიდებლობის შესახებ ბრიუსელის შეშფოთების გადასაჭრელად.

მაგრამ დანარჩენი დაბლოკილი თანხები - დაახლოებით 11,7 მილიარდი ევრო - სავარაუდოდ დარჩება გაყინული ადამიანის უფლებების დაცვასთან, საჯარო კონტრაქტების გაფორმებასთან და ქვეყანაში აკადემიური თავისუფლებების მდგომარეობასთან დაკავშირებული საკითხების გამო.

ბუდაპეშტი ასევე ელოდება 10,4 მილიარდი ევროს გრანტებსა და იაფ სესხებს ევროკავშირის პოსტპანდემიური აღდგენის ფონდიდან, რომელიც ასევე დაბლოკილი უნდა იყოს მანამ, სანამ უნგრეთი არ განახორციელებს ანტიკორუფციული რეფორმების სერიას.

მიუხედავად ამისა, ორბანის თანაშემწემ თქვა, რომ ბუდაპეშტი ვეტოს მოხსნის მხოლოდ იმ შემთხვევაში, თუ ბრიუსელი გადასცემს მთელ გაყინულ ფულს, რაც დაახლოებით 30 მილიარდ ევროს შეადგენს.

პრემიერმინისტრის მრჩეველმა თქვა, რომ უკრაინის ევროკავშირში გაწევრიანება ბუდაპეშტისთვის "წითელ ხაზად" რჩება და აღნიშნა, რომ კიევს უნდა შესთავაზონ ბლოკთან სტრატეგიული პარტნიორობა, რადგან მას ჯერ არ შეუსრულებია გაწევრიანების მოლაპარაკებების გახსნის კრიტერიუმები.

Тбилиси

გლდანის რაიონში სანდრო ახმეტელის (ყოფილი აკაკი ვასაძის) რეაბილიტირებული ქუჩა გაიხსნა

გლდანის რაიონში სანდრო ახმეტელის (ყოფილი აკაკი ვასაძის) რეაბილიტირებული ქუჩა გაიხსნა. პროექტზე ადგილობრივმა გამგეობამ მერიის შესაბამის სამსახურებთან ერთად იმუშავა.

რეაბილიტირებული ქუჩა თბილისის მერმა კახა კალაძემ მერის მოადგილეებთან, ანდრია ბასილაიასთან და ირაკლი ბენდელიანთან ერთად დაათვალიერა.

„გლდანის რაიონში კიდევ ერთი ინფრასტრუქტურული პროექტი დასრულდა. სანდრო ახმეტელის ქუჩაზე, საკმაოდ მძიმე მდგომარეობა იყო. პირველ რიგში, განახლდა მიწისქვეშა კომუნიკაციები, რომელიც ამორტიზებული იყო და სერიოზულ პრობლემას უქმნიდა ტერიტორიაზე არსებულ საცხოვრებელ კორპუსებს. მოეწყო სადრენაჟე სისტემა, სანიაღვრე ქსელი, შეიცვალა წყლის, წყალარინებისა და გაზმომარაგების ქსელები. ყველაფერი, რაც კი აუცილებელი იყო, გამოცვლილია. გარდა ამისა, ელექტროგადამცემი ხაზები მიწისქვეშა კაბელარხებში განთავსდა. პარალელურად, მიმდინარეობს სამი სკვერის სარეაბილიტიაციო სამუშაოები. აქაც ყველაფერი სრულად მოწესრიგდება. ძალიან მიხარია, რომ კიდევ ერთი მნიშვნელოვანი პროექტი განვახორციელეთ“, - განაცხადა კახა კალაძემ.

სამუშაოების ფარგლებში, სრულად შეიცვალა სანიაღვრე ქსელი და 15 000 კვადრატულ მეტრ ფართობზე ასფალტის საფარი დაიგო. გზის საფარის მოწესრიგებამდე, ტერიტორიაზე კომპანია „ჯორჯიან უოთერ ენდ ფაუერმა“ მიწისქვეშა კომუნიკაციები შეცვალა, შესაბამისმა კომპანიებმა კი არსებული ქსელები რეაბილიტაციის შემდეგ, მიწისქვეშა კაბელარხებში განათავსეს.

გარდა ამისა, ახმეტელის ქუჩაზე შპს „თბილსერვის ჯგუფმა“ მოაწყო გარე განათების ქსელი და დამონტაჟდა ენერგოეფექტური LED სანათები. განთავსდა 30 ერთეული დიდი ზომის ნაგავშემკრები კონტეინერი.

ტრანსპორტისა და ურბანული განვითარების სააგენტომ გზის სავალი ნაწილიდან გამოყო საზოგადოებრივი ტრანსპორტისთვის განკუთვნილი ზოლი, დაიხაზა საგზაო მონიშვნები და ზებრა გადასასვლელები, დამონტაჟდა შუქნიშნები და მოეწყო საპარკინგე ადგილები. მოეწყო საზოგადოებრივი ტრანსპორტის მოსაცდელები.

ახმეტელის ქუჩის რეაბილიტაციის ფარგლებში, გამწვანების მასშტაბურ სამუშაოებს გარემოს დაცვის საქალაქო სამსახური ახორციელებს. კერძოდ, გზის მიმდებარედ არსებულ თარგებში, რომელთა საერთო ფართობი 3 700 კვადრატული მეტრია, მოეწყო სარწყავი სისტემები, შეტანილია ნოყიერი მიწის ნაზავი და მიმდინარეობს სხვადასხვა სახეობის ხე-მცენარეების დარგვა. ამ ეტაპზე, დარგულია 419 ძირი მწვანე ნერგი. გარდა ამისა, ტერიტორიაზე დაიგება ბალახის საფარი.

პარალელურად, ხორციელდება გზის მიმდებარედ არსებული სამი სკვერის რეაბილიტაცია. ჯამში, 5 404 კვადრატულ მეტრ ფართობზე უკვე მოეწყო საფეხმავლო ბილიკები, გარე განათებისა და სარწყავი სისტემები, დამონტაჟდება საბავშვო ატრაქციონები და ჩატარდება გამწვანების სამუშაოები.

რეაბილიტაციის პროექტის საერთო ღირებულებამ 5 327 846 ლარი შეადგინა.

დედაქალაქის მერთან ერთად სანდრო ახმეტელის ქუჩაზე გლდანის რაიონის გამგებელი ბესიკ კალაძე, მერიის შესაბამისი სამსახურების უფროსები და საკრებულოს წარმომადგენლები იმყოფებოდნენ.