,
უნგრეთმა და ჩინეთმა, ეკონომიკური და კულტურული თანამშრომლობის გაღრმავების მიზნით, რამდენიმე ახალ შეთანხმებას, მათ შორს სტრატეგიული თანამშრომლობის ხელშეკრულებას, მოაწერეს ხელი.
ხელშეკრულებების გაფორმება ჩინეთის პრეზიდენტის, სი ძინპინის უნგრეთში ვიზიტის ფარგლებში განხორციელდა.
უნგრეთის პრემიერ-მინისტრმა, ვიქტორ ორბანმა სი ძინპინთან დედაქალაქ ბუდაპეშტში გამართული შეხვედრის შემდეგ განაცხადა, რომ უნგრეთი გააგრძელებს ჩინური ინვესტიციების ხელშეწყობას.
„მინდა დავარწმუნო პრეზიდენტი, რომ უნგრეთი გააგრძელებს სამართლიანი პირობების შექმნას ჩინური კომპანიებისთვის, რომლებიც ინვესტირებას ახდენენ ჩვენს ქვეყანაში და რომ ჩვენ შევქმნით შესაძლებლობას ყველაზე თანამედროვე დასავლური და ყველაზე თანამედროვე აღმოსავლური ტექნოლოგიების უნგრეთში შეხვედრისა და თანამშრომლობის დამყარებისთვის,“ – განაცხადა ორბანმა.
სი ძინპინის თქმით კი, ის და ორბანი შეთანხმდნენ, რომ „ერთი სარტყლისა და ერთი გზის“ ინიციატივა „უაღრესად შეესაბამება უნგრეთის სტრატეგიას აღმოსავლეთისკენ გახსნის შესახებ“ და რომ ჩინეთი მხარს უჭერს უნგრეთს, შეასრულოს კიდევ უფრო დიდი როლი ჩინეთ-ევროკავშირის ურთიერთობების ხელშეწყობაში.
სი ძინპინის უნგრეთში ვიზიტის ფარგლებში უნგრელმა და ჩინელმა ოფიციალურმა პირებმა გააფორმეს სტრატეგიული პარტნიორობის შეთანხმება და ხელი მოაწერეს 18 სხვა ხელშეკრულებას და ურთიერთგაგების მემორანდუმს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
