რუსეთი უკრაინის წინააღმდეგ ომში ლაოსის ჩართვას ცდილობს. უკრაინის სამხედრო დაზვერვის მონაცემებით ლაოსი თავდაპირველად სამხედრო ინჟინრების გაგზავნას გეგმავს, შემდგომ კი სხვაგვარი სამხედრო პერსონალის ჩართვაც აღარ იქნება გამორიცხული. მათი თავდაპირველი და დეკლარირებული მიზანი რუსეთის სამხედრო ძალების საინჟინრო მომსახურება და განაღმვა იქნება.
კომუნისტურ ლაოს სახალხო რევოლუციური პარტია მართავს, რომელიც ერთდროულად რუსეთის მოკავშირეცაა და ჩინეთზე თითქმის სრულად ჩამოკიდებულიც - ლაოსი ღიად, თავისი სურვილით გადაეშვა ჩინეთის ეკონომიკურ სესხის მახეში.
ამ ყველაფერს ემატება რამდენიმე დღის წინ გავრცელებული ინფორმაცია, რომლის მიხედვითც რუსეთი დამატებით 30 ათასი კორეელი სამხედროს მიღებას აპირებს თავის რიგებში. კორეა ამით სამ რაღაცას იღებს: 1. თითო სამხედროზე ფულს დოლარში; 2. აქტიურ სამხედრო გამოცდილებას; 3. მისთვის აღარ სცალია დასავლეთს.
აღარ სცალიათ-მეთქი როცა ვამბობთ, ზუსტად ეს მოტივაცია აქვს ჩინეთსაც, რომლის წარმომადგენლებაც განაცხადეს, რომ ჩინეთისათვის რუსეთის დამარცხება დაუშვებელიაო. ამას სამი ძირითადი მიზეზი აქვს: 1. ვეღარც მისთვის იცლიან, როდესაც ფოკუსი და რესურსები რუსეთ-უკრაინაზეა მიმართული; 2. რუსეთის დამარცხება ნეგატიური პრედეცენტი იქნება მისი სამომავლო ექსპანსიური გეგმებისათვის; 3. გაჭიანურებულ ომში, რაც უფრო გამოიფიტება რუსეთი, მით უფრო მეტად გახდება მასზე დამოკიდებული, მაგრამ ჩინეთისათვის რუსეთი იმგვარად უნდა იყოს გამარჯვებული, რომ სხვა აღარაფრის თავი აღარ ჰქონდეს - ანუ პიროსისეული გამარჯვება უნდა მას. და თან ისე აკეთებს ამ ყველაფერს ჩინეთი, რომ დისტანცირდეს და თან მშვიდობაზეც ისაუბროს და კრემლსაც ანიშნოს, რომ მის მიღმა ბევრი არჩევანი რუსეთს აღარ აქვს.
ლაოსი და ჩრდილოეთ კორეა ჩინეთის წინააღმდეგობის შემთხვევაში არაფერს და ვერაფერს ვერ გააკეთებდნენ. თუმცა ამ ყველაფრიდან ის რეალობა კი იკვეთება, რომ რუსეთს გამოცდილ სამხედრო ძალების რაოდენობაში გაუჭირდა და საერთაშორისო არეალზე მოკავშირეებს ეძებს, რათა შეავსოს აღნიშნული დეფიციტი.
