,
უკრაინის თავდაცვის მინისტრის მოადგილემ, ანა მალიარმა განაცხადა, რომ უკრაინულმა ძალებმა სამხრეთში ზოგან უკვე გაარღვიეს რუსეთის თავდაცვის პირველი ხაზი და გადავიდნენ შუალედურ ხაზზე.
"თუ ჩვენ ვსაუბრობთ სამხრეთზე, ისევე როგორც ბახმუტის მიმართულებით, ჩვენი ძალები აგრძელებენ შეტევითი ოპერაციების განხორციელებას, მტრის სერიოზული წინააღმდეგობის გავლით.
თუმცა, ჩვენმა ჯარებმა სამხრეთში ზოგან უკვე გაარღვიეს [რუსეთის] თავდაცვის პირველი ხაზი და გადავიდნენ შუალედურ ხაზზე. მტერმა [იქ] ფაქტობრივად ააგო საინჟინრო სიმაგრეები მთავარ სიმაღლეებზე. ეს, რა თქმა უნდა, ართულებს ჩვენი ჯარების მოძრაობასა და თავად ბრძოლას.
სამხრეთშიც და აღმოსავლეთშიც მტერი აგროვებს თავის რეზერვებს. ახლა კი ძირითადად პროფესიულ ნაწილებს აგროვებს", - აღნიშნა უკრაინის თავდაცვის მინისტრის მოადგილემ.
მაშინ, როდესაც უკრაინაში კონფლიქტი ესკალაციის ახალ ფაზაში შევიდა, კვლავ გააქტიურდა დისკუსიები უკრაინის ტერიტორიაზე დასავლური ჯარებისა და კერძო თავდაცვითი კომპანიების გაგზავნის შესახებ, - წერს ფრანგული გაზეთი Le Monde-ი წყაროებზე დაყრდნობით.
„დიდ ბრიტანეთსა და საფრანგეთს შორის მიმდინარეობს დისკუსიები თავდაცვის სფეროში თანამშრომლობასთან დაკავშირებით, განსაკუთრებით ევროპაში მოკავშირეთა ძირითადი ჯგუფის შექმნის მიზნით, რომელიც ორიენტირებულია უკრაინასა და უფრო ფართო ევროპულ უსაფრთხოებაზე“, - განუცხადა Le Monde-ს ბრიტანულმა სამხედრო წყარომ.
ფრანგული გაზეთი აღნიშნავს, რომ უკრაინაში დასავლური ჯარების ან კერძო კომპანიების გაგზავნის შესახებ დისკუსიები 2023 წლის ბოლოდან შორ მანძილზე მოქმედი იარაღის მიწოდების გაზრდის ფონზე განახლდა.
წყაროების განცხადებით, უკრაინელებს არ შეუძლიათ ამ ტიპის რაკეტების გამოყენება ადგილზე დასავლური მხარდაჭერის გარეშე.
