,
უკრაინის შეიარაღებული ძალების მთავარსარდალმა, ოლექსანდრ სირსკიმ განაცხადა, რომ ფრონტზე მდგომარეობა მართლაც რთულია, თუმცა აღნიშნა, რომ ფრონტზე ვითარება განსხვავებული არ შეიძლება იყოს.
„უდავოა, რომ ყოველი დღე მოითხოვს მაქსიმალურ ძალისხმევას ჩვენი ჯარისკაცებისა და ოფიცრების მხრიდან. მაგრამ ჩვენ არა მხოლოდ დაცვაში ვართ, არამედ ყოველდღიურად წინ მივდივართ სხვადასხვა მიმართულებით. ბოლო დროს ჩვენ მიერ დაბრუნებული პოზიციების რაოდენობა აღემატება დაკარგული პოზიციების რაოდენობას. მტერმა სტრატეგიულ რაიონებში მნიშვნელოვანი წინსვლა ვერ მოახერხა და მის ტერიტორიულ მიღწევებს, ასეთის არსებობის შემთხვევაში, ტაქტიკური მნიშვნელობა აქვს. ჩვენ ვაკვირდებით ამ სიტუაციას“, - აღნიშნა გენერალმა.
„უნდა აღინიშნოს, რომ ამჟამინდელი ვითარება გარკვეულ სექტორებში რჩება დაძაბული. რუსი ოკუპანტები აგრძელებენ ძალისხმევის გაზრდას და აქვთ რიცხობრივი უპირატესობა ცოცხალი ძალით. ისინი ტრადიციულად არ ითვლიან დანაკარგებს და აგრძელებენ მასიური თავდასხმების ტაქტიკის გამოყენებას. ზოგიერთ რაიონში უკრაინის თავდაცვის ძალების ქვედანაყოფებმა რამდენიმე ათეული თავდასხმა მოიგერიეს“, - განაცხადა ოლექსანდრ სირსკიმ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
