უკრაინის გენშტაბი - რუსი ოკუპანტები ახორციელებენ შეტევას სევეროდონეცკის მიმართულებით, ბრძოლა გრძელდება

дата: 291

რუსი ოკუპანტები, საარტილერიო ცეცხლის მხარდაჭერით, ახორციელებენ შეტევას სევეროდონეცკის დასახლების მიმართულებით, ბრძოლა გრძელდება, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

მათივე ცნობით, სივერსკის მიმართულებით, რუსული ძალები აგრძელებენ უკრაინა-რუსეთის საზღვრის გაძლიერებას, საყრდენი პუნქტების აღჭურვას ბრიანსკის ოლქის სასაზღვრო რაიონებში.

„რუსი ოკუპანტები აგრძელებდნენ რუსეთის ფედერაციის ტერიტორიიდან სუმის ოლქში განლაგებული თავდაცვის ძალების პოზიციების და სამოქალაქო ინფრასტრუქტურის დაბომბვას არტილერიისა და ნაღმმტყორცნების გამოყენებით.

ხარკოვის მიმართულებით მტრის ძირითადი ძალისხმევა მიმართულია ოკუპირებული პოზიციების შენარჩუნებაზე. რუსულმა ძალებმა რუბეჟნოესთან ახლოს სამოქალაქო ინფრასტრუქტურას საარტილერიო ცეცხლი გაუხსნეს. გარდა ამისა, მტერმა კიდევ ერთხელ სცადა შეტევითი ოპერაციების ჩატარება ტერნოვას მიმართულებით, მაგრამ მცდელობა წარუმატებელი აღმოჩნდა.

არტილერიისა და არმიის თვითმფრინავების მხარდაჭერით მტერი წარუმატებლად ცდილობდა დაეკავებინა სოფელი პასიკა.

ლიმანის მიმართულებით მტერმა გააძლიერა საომარი მოქმედებები. საარტილერიო და საჰაერო მხარდაჭერით აწარმოებს საბრძოლო მოქმედებებს სოფელ ლიმანის ტერიტორიაზე.

ბახმუტის მიმართულებით მტერმა შეტევითი ოპერაციები ჩაატარა კომიშუვახას, იაკოვლივკასა და ტროიცკის ტერიტორიებზე, წარმატებას ვერ მიაღწია და დანაკარგები განიცადა.

ავდიივკას მიმართულებით, მტერი არ წყვეტს თავდაცვის ძალების პოზიციებისა და სამოქალაქო ინფრასტრუქტურის ნაღმმტყორცნებიდან და არტილერიიდან დაბომბვას ავდიივკას, პისკის, მარინკას, ორიხივისა და ნოვოსილკას დასახლებების რაიონებში.

ის იყენებდა თავდასხმის და სამხედრო თვითმფრინავებს კამიანკას, ავდიივკასა და ნოვომიხაილივკას რაიონებში.

საომარი მოქმედებების განსახორციელებლად და უკრაინის ტერიტორიაზე ცოცხალი ძალისა და ტექნიკის მნიშვნელოვანი დანაკარგების შესავსებად, რუსი ოკუპანტები აყალიბებენ სარეზერვო ნაწილებს სამხრეთ სამხედრო ოლქის შემადგენლობიდან,”- აცხადებენ გენშტაბში.

მათივე ცნობით, უკრაინელმა სამხედროებმა, ბოლო 24 საათის განმავლობაში, დონეცკსა და ლუგანსკში ოკუპანტების 9 თავდასხმა მოიგერიეს.

„განადგურდა 3 ტანკი, 8 საარტილერიო სისტემა, 18 ერთეული ჯავშანტექნიკა, სპეციალური ჯავშანმანქანა და სხვა მანქანები. საჰაერო თავდაცვის ნაწილებმა ამ მიმართულებით გაანადგურეს 6 Orlan-10 ტიპის უპილოტო საფრენი აპარატი და ერთი ოპერატიულ-ტაქტიკური დონის უპილოტო საფრენი აპარატი ZALA,“- აცხადებენ გენშტაბში.

პარიზის წიგნის ფესტივალზე საქართველოს მწერალთა სახლი ეროვნული სტენდით პირველად არის წარმოდგენილი

კულტურის სამინისტროს მხარდაჭერით 12-14 აპრილს საქართველოს მწერალთა სახლი 2024 წლის პარიზის წიგნის ფესტივალზე ეროვნული სტენდით პირველად მონაწილეობს.

Grand Palais Éphémère–ში ფესტივალისა და საქართველოს ეროვნული სტენდის გახსნას მწერალთა სახლის დირექტორი ქეთევან დუმბაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში გოჩა ჯავახიშვილი და ლიტერატურული სფეროს წარმომადგენლები ესწრებოდნენ.

საქართველოს ეროვნული სტენდის პრეზენტაცია გაიმართა ღონისძიებით - „ჰაგიოგრაფიიდან პოსტმოდერნიზმამდე“. მწერალთა სახლის სტენდის სტუმრებს, ქართული მწერლობის გაცნობასთან ერთად, საინტერესო კალიგრაფიულ აქტივობაში ჩართვის შესაძლებლობა ჰქონდათ. კალიგრაფმა გიორგი სისაურმა მათ ქართული ანბანით დაუწერა სასურველი სიტყვები, გამონათქვამები, ფრაზები, სახელები და ა. შ. ასევე გაიმართა ღონისძიება, სახელწოდებით, „თექვსმეტსაუკუნოვანი უწყვეტი ლიტერატურული პროცესი“, რომელიც განიხილავს ქართულ ლიტერატურას, ქართულ-ფრანგულ ლიტერატურულ ურთიერთობებსა და ქართული და ევროპული ლიტერატურის კავშირს.

პირველ საფესტივალო დღეს გამართულ პანელ-დისკუსიაში მონაწილეობა მიიღეს საქართველოს საგანგებო და სრულუფლებიანმა ელჩმა საფრანგეთის რესპუბლიკაში გოჩა ჯავახიშვილმა და ფრანგული ფილოლოგიის დოქტორმა, პროფესორმა, ივანე ჯავახიშვილის სახელობის თბილისის სახელმწიფო უნივერსიტეტის რომანული ფილოლოგიის ფაკულტეტის ხელმძღვანელმა ბელა ხაბეიშვილმა. შეხვედრას ასევე ესწრებოდნენ უცხოელი გამომცემლები, ლიტერატურული აგენტები, მედიის წარმომადგენლები და ქართული სათვისტომოს საპატიო წევრები.

ფესტივალის მსვლელობისას ქართულ სტენდზე დაგეგმილია არაერთი აქტივობა და საქმიანი შეხვედრა - PUBLISHERS MATCHMAKING. შეხვედრის მონაწილეები იქნებიან საქართველოს მწერალთა სახლი, ქართული გამომცემლობები: „სეზან ფაბლიშინგი“, „მედუზა,“ „ბაკმი“ და მთარგმნელები - მაია ვარსიმაშვილი და მაია გიორხელიძე. შეხვედრაზე განიხილავენ ქართული ლიტერატურის კატალოგს. მთარგმნელი დალი იაშვილი წარადგენს მიხეილ ჯავახიშვილის მოთხრობას - „ლამბალო და ყაშა“ და მოთხრობების კრებულს. მთავარ სცენაზე გაიმართება წიგნის - „მზე, მთვარე და პურის ყანა“ წარდგენა. წიგნს წარადგენენ ავტორი - მწერალი და კინორეჟისორი თემურ ბაბლუანი და ეროვნული კინოცენტრის წარმომადგენელი ევროპაში სოფიო ბაბლუანი. ქართველ გამომცემლებთან ერთად საქართველოს სტენდთან იქნებიან ფრანგული გამომცემლობები: LE CHERCHE MIDI, GINGKO, EDITIONS DES CARNETS DU DESSERT DE LUNE, MEDUZA, და იტალიური გამომცემლობა MODERN TIMES, რომლებიც წარმოადგენენ ფრანგულად თარგმნილ კლასიკურ და თანამედროვე ქართულ პროზასა და პოეზიას.

საქართველოს ეროვნულ სტენდზე წარმოდგენილი იქნება ბუკლეტი ქართველი ავტორების 50-ამდე ნამუშევრის სინოპსისითა და ამონაბეჭდებით ისეთი ცნობილი ნაწარმოებებიდან, როგორიც არის „შუშანიკის წამება“, „ვეფხისტყაოსანი“ და სხვა.

აღსანიშნავია, რომ პარიზის წიგნის ბაზრობა ევროპის ერთ-ერთი ყველაზე მნიშვნელოვანი კულტურული მოვლენაა, რომელიც ყოველწლიურად გაზაფხულზე იმართება და მასში მონაწილეობას 1 200 გამომცემელი და 2 000 ავტორი იღებს. საქართველოს წელს პირველად მიეცა საშუალება, საკუთარი სტენდით ჩაერთოს საფესტივალო აქტივობებში.

ფესტივალში ეროვნული სტენდით მონაწილეობა საქართველოსთვის ძალიან მნიშვნელოვანია.

საფესტივალო აქტივობები მწერალთა სახლს, ქართველ მწერლებსა თუ გამომცემლებს დაეხმარება ლიტერატურული ურთიერთობების წარმართვაში, ქართული მწერლობის პოპულარიზაციაში, ახალი კონტაქტების მოძიებასა და მთარგმნელობითი საქმიანობის ხელშეწყობაში.