უკრაინა და საქართველოს დასავლური ორიენტაცია ქართული ულტრამემარჯვენე პრორუსული ჯგუფების სამიზნეში

თარიღი: 318

თებერვალში უკრაინაზე სამხედრო თავდასხმის ფონზე, საქართველოში განსაკუთრებით შესამჩნევი გახდა ულტრამემარჯვენე ფლანგის მკვეთრად პრორუსული ფრთის გააქტიურება. ულტრამემარჯვენე ძალები ცდილობდნენ უკრაინის კრიზისი ქართულ საზოგადოებაში ნატოს წინააღმდეგ სკეპტიკური განწყობების გასაღვივებლად და დასავლეთისგან სრული დისტანცირების საჭიროების საილუსტრაციოდ გამოეყენებინათ.

დემოკრატიის კვლევის ინსტიტუტის მიერ განხორციელებული მედია მონიტორინგისას გამოვლინდა, რომ ულტრამემარჯვენე ფლანგის ღიად კრემლისტური ძალების პროპაგანდისტული რიტორიკა მიზნად ისახავს საქართველოს დასავლური საგარეო ვექტორის ცვლილებას და ქვეყნის ჩართვას რუსეთის მიერ ინიციირებულ საერთაშორისო პლატფორმებში.

ულტრამემარჯვენე ჯგუფების პროპაგანდისტული და დეზინფორმაციული გზავნილები

24 თებერვალს უკრაინაში რუსეთის სამხედრო ძალების შეჭრას მყისიერად გამოეხმაურა ულტრამემარჯვენე მედია პლატფორმა „ალტ-ინფო“ და საგანგებო ეთერის ფორმატში უკრაინის წინააღმდეგ დეზინფორმაციული კამპანია წამოიწყო. გადაცემას ფონად გასდევდა 2015 წლის აგვისტოში ჩინეთში ქიმიური საწყობის აფეთქების კადრები, რომელიც გამიზნულად ქმნიდა პანიკის გამომწვევ ყალბ მედია შინაარს და წარმოდგენილი იყო, როგორც რუსეთის მიერ უკრაინის დაბომბვის ილუსტრაცია. გარდა ამისა, მთელი გადაცემა გამსჭვალული იყო ანტიდასავლური რიტორიკით და მიმართული იყო რუსეთის, როგორც უალტერნატივო ძალის წარმოჩენისკენ. გადაცემის წამყვანები ღიად მოუწოდებდნენ უკრაინასა და საქართველოს დასავლური კურსის ცვლილებისკენ.

24-25 თებერვალს უკრაინის მადისკრედიტირებელი მედია კამპანია გააქტიურდა ულტრამემარჯვენე ფეისბუქ გვერდზე „კარდჰუ“, სადაც უწყვეტ რეჟიმში ვრცელდება ფოტო/ვიდეო მასალა რუსეთის მხრიდან უკრაინული ქალაქების დაბომბვისა და საავიაციო იერიშების შესახებ. აღნიშნული გვერდი ასევე გამოირჩევა ნატოს დისკრედიტაციის მცდელობით და უკრაინის კრიზისის ფონზე, სამხედრო ალიანის წევრობას საქართველოსთვის საფრთხედ აფასებს.

ანალოგიური რიტორიკა აქვს ულტრამემარჯვენე პარტიის „კონსერვატიული მოძრაობის“ ლიდერს ზურა მახარაძეს, რომელმაც TV პირველთან სატელევიზიო ინტერვიუში აღნიშნა, რომ ნატო არ უზრუნველყოფს ჩვენს უსაფრთხოებას და ამის ფონზე რუსეთთან ღია მოლაპარაკებებია საჭირო.

უკრაინაში რუსეთის შეჭრას გამოეხმაურა „საქართველოს პატრიოტთა ალიანსის“ ლიდერი ირმა ინაშვილიც, რომელმაც ნატოში ინტეგრაციის მხარდაჭერა ქვეყნის ღალატად შეაფასა და საქართველოს ხელისუფლებას უკრაინის ღია მხარდაჭერის ნაცვლად, სიჩუმისკენ მოუწოდა.

ულტრამემარჯვენე პრორუსული ძალების პროპაგანდისტული რიტორიკა ჯერ კიდევ უკრაინაში ომის დაწყებამდე გააქტიურდა.

2 თებერვალს პოლიტიკური პარტია „კონსერვატიული მოძრაობის“ ლიდერმა კონსტანტინე მორგოშიამ „ალტ-ინფოს“ გადაცემა „დღის კომენტარში“ განაცხადა, რომ ნატოს რეალური მისია „მართლმადიდებელი ქვეყნების განადგურებაა“.

12 თებერვალს გადაცემა „ალტ ანალიტიკის“ წამყვანებმა მიმოიხილეს რუსეთ-უკრაინის კონფლიქტი, სადაც „კონსერვატიული მოძრაობის“ გენერალურმა მდივანმა გიორგი ქარდავამ და თავმჯდომარე ზურა მახარაძემ დასავლეთი წარმოაჩინეს სუსტ მხარედ, რომელიც უკრაინის კრიზისის ფონზე, ვერც საქართველოს დაიცავს.

კრემლისტური მედია საშუალების „საქართველო და მსოფლიოს“ ონლაინ პლატფორმაზე ქვეყნდება სტატიები, სადაც ავტორები ღიად ახდენენ ნატოს სამხედრო ალიანსისა და აშშ-ს დემონიზაციას, ხოლო უკრაინასთან მიმართებაში იმეორებენ კრემლისტურ ნარატივებს, რომ რუსეთი მხოლოდ საკუთარი უსაფრთხოების დასაცავად იბრძვის.

ულტრამემარჯვენე დისკურსში, ასევე გაჩნდა ღია მოწოდებები საქართველოს რუსეთის მიერ ინიციირებულ „3+3“ ფორმატში ჩართვასთან დაკავშირებით. „პრიმაკოვის ფონდის“ ხელმძღვანელმა დიმიტრი ლორთქიფანიძემ ფეისბუქ გვერდზე 22 იანვარს გამოაქვეყნა პოსტი, სადაც აღნიშნა, რომ კონსტიტუციაში ევროატლანტიკური სივრცისადმი კუთვნილების საკითხის ჩაწერა ქვეყანას შესაძლებლობას უსპობს მონაწილეობა მიიღოს რეგიონული თანამშრომლობის პლატფორმაში.

უკრაინაში რუსეთის სამხედრო ინტერვენციამდე რამდენიმე დღით ადრე, 21 თებერვალს, ულტრამემარჯვენე პარტიებმა „საქართველოს პატრიოტთა ალიანსმა“, „ქართულმა მარშმა“ და მათთან აფილირებულმა 50-მდე ორგანიზაციამ, ღია წერილით მიმართა რუსეთის ფედერაციის პრეზიდენტს ვლადიმერ პუტინს. წერილში აღნიშნულია, რომ ისინი ემხრობიან საქართველოს სამხედრო ნეიტრალიტეტს და ამის ფონზე, რუსეთთან ურთიერთობის დათბობას. აღნიშნული საქართველოში ულტრამემარჯვენე პოლიტიკური სუბიექტების პრორუსული საგარეო კურსის ღია და მასშტაბური დემონსტრაციაა.

«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება.

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ, მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/