,
სომხეთისა და დე ფაქტო ყარაბაღის დროშიანი ჯარისკაცების შესაძლო დახვრეტის ამსახველ ვიდეომასალას სომხეთის სახალხო დამცველი, არმან ტატოიანი გამოეხმაურა. ვიდეომასალის ნამდვილობაში ეჭვი შეაქვს აზერბაიჯანულ მხარეს.
“გავრცელდა ორი ვიდეო, ასევე, ფოტომტკიცებულებები, საიდანაც ირკვევა, რომ აზერბაიჯანელი სამხედროები არაადამიანურად, განსაკუთრებული სისასტიკით ეპყრობიან სომეხ ტყვეებს”, – განაცხადა სომხეთის სახალხო დამცველმა, რასაც მალევე გამოეხმაურა აზერბაიჯანის მთავარი პროკურატურა, რომლის განცხადებითაც, გავრცელებული კადრების ნამდვილობა საეჭვოა.
“ამ ვიდეოებში აზერბაიჯანული არმიის წევრები ამცირებენ სამხედრო ტყვეებს და შემდეგ კლავენ, რასაც თან ერთვის განსაკუთრებული ცინიზმი. აზერბაიჯანელი ჯარისკაცების ქცევა და საუბარი სავსეა სიძულვილით. ვიდეოები გავრცელდა აზერბაიჯანული წყაროების მიერ”, – ნათქვამია ტატოიანის განცხადებაში.
ამასთან, მისივე განცხადებით, “მას შემდეგ, რაც აზერბაიჯანულმა მხარემ უარყო კავშირი აღნიშნულ ფაქტთან, დაიწყო ამ ვიდეობის ინტერნეტიდან წაშლა. ვიდეოები შეიცავს სამხედრო დანაშაულის უტყუარ მტკიცებულებას”.
ომბუდსმენის განცხადებიდან ირკვევა, რომ სომხეთის სახალხო დამცველის ოფისმა შეძლო დაედგინა ვიდეოში მომხდარი ფაქტის ადგილმდებარეობა და დრო. ასევე, მისივე თქმით, აღნიშნული მასალები გადაეგზავნება საერთაშორისო ორგანიზაციებს თუ დამკვირვებლებს.
აზერბაიჯანის გენერალური პროკურატურის განცხადებით, რომელსაც გამოცემა APA ავრცელებს, პირველადი ნიშნებით, ვიდეო ყალბია.
“ამჟამად მიმდინარეობს გამოძიება და საზოგადოებას ეცნობება დეტალური ინფორმაცია”, – ნათქვამია ბაქოს მიერ გავრცელებულ განცხადებაში.
ვიდეოები, სადაც ასახულია სომხეთისა და დე ფაქტო ყარაბაღის დროშიანი ჯარისკაცების დახვრეტის ფაქტი, დღეს სხვადასხვა სოციალური ქსელის მეშვეობით გავრცელდა, თუმცა, რიგ შემთხვევებში, აღნიშნული სოციალური ქსელების შიდა პოლიტიკიდან გამომდინარე, ვიდეოები მალევე წაიშალა.
წყარო: netgazeti.ge
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
