British Airways-მა ლონდონი-თბილისი-ლონდონის მიმართულებით რეგულარული ფრენები დაიწყო. ახალი პირდაპირი ავიარეისის დაწყებასთან დაკავშირებით British Airways-მა ქართული ტურისტული კომპანიებისთვის პრეზენტაცია გამართა. ინფორმაციას ტურიზმის ეროვნული ადმინისტრაცია ავრცელებს.

პრეზენტაციის ფარგლებში, საქართველოს ტურიზმის ეროვნული ადმინისტრაციის ხელმძღვანელი მაია ომიაძე British Airways-ის რეგიონულ კომერციულმენეჯერსემილდელიბაშევს შეხვდა. საუბარი შეეხო ბრიტანული ავიახაზების უახლეს პროდუქტებსა და სერვისებს. ასევე, განხილული იყო სამომავლო თანამშრომლობა ტურიზმის სფეროში, ხელს შეუწყობს დიდი ბრიტანეთიდან საქართველოში ტურისტული ნაკადების გაზრდას და ქვეყნის ცნობადობის ამაღლებას.

„დიდი ბრიტანეთი საქართველოსთვის ერთ-ერთი ყველაზე სტრატეგიული ტურისტული ბაზარია, ჩვენ მუდმივად ვახორციელებთ კამპანიებს, წელს კი ტურიზმის ეროვნული ადმინისტრაცია გაორმაგებული ძალებით აწარმოებს მასშტაბურ მარკეტინგულ კამპანიებს, როგორც სოციალური მედიით, ასევე საერთაშორისო კომპანიების ჩართულობით, მათ შორის British Airways-თან ერთად. წლის განმავლობაში საქართველოს ეწვევიან ბრიტანელი ჟურნალისტები და ბლოგერები. ჩვენ ვეცდებით საქართველოს ცნობადობის შესახებ კამპანიები უფრო მასშტაბური გავხადოთ და ბევრად მეტი ბრიტანელი მოგზაური ჩამოვიყვანოთ საქართველოში“, - აცხადებს ტურიზმის ეროვნული ადმინისტრაციის ხელმძღვანელი მაია ომიაძე.

„ჩვენ ძალიან მოხარულები ვართ ტურიზმის ეროვნულ ადმინისტრაციასთან ერთობლივი თანამშრომლობით, მოხარულები ვართ, რომ British Airways-ის პირველი საინაუგურაციო ფრენისას ბორტი მგზავრებით სრულად შეივსო. ეს აჩვენებს საქართველოსადმიბრიტანელი ვიზიტორების მხრიდანდიდ პოტენციალსა და ინტერესს, რომ იმოგზაურონ საქართველოში. ძალიან კარგი ისტორია გვაქვს, ჩვენი წინამორბედი ავიაკომპანია British Mediterranean Airways საქართველოშიდაფრინავდა 1997 წლიდან 2013 წლამდე. ჩვენ ახლა დავბრუნდით, Airbus-320neo ლაინერით, რომელიც სრულიად ახალია. საქართველოს მიმართულებაზე ინტერესი ჩვენს ყველა მოლოდინებს აჭარბებს“, -აცხადებს British Airways-ის რეგიონული კომერციული მენეჯერი ემილ დელიბაშევი.

ღონისძიებაზე საჰაერო ტრანსპორტის საერთაშორისო ასოციაციის IATA-ს წევრი 40-მდე ქართული კომპანია იყო წარმოდგენილი.

„ძალიან მოხარულები ვართ რომ British Airways შემოვიდა საქართველოში. დიდი ხანია არ უფრენია საქართველოს მიმართულებით და მისი დაბრუნება ძალიან დიდი მიღწევაა. ეს ხელს შეუწყობს ტურისტული ნაკადების შემოყვანას საქართველოში, ასევე გაყვანას. დღევანდელი პრეზენტაცია იყო ძალიან საინტერესო, ავიაკომპანიის სიხშირეები ბევრია და იმედი გვაქვს გაყიდვები ამ მიმართულებით ძალიან მაღალი იქნება. მთელ მსოფლიოში ბრიტანეთის ავიახაზებს ლოიალური კლიენტების დიდი არმია ჰყავს, ეს კლიენტები როგორც წესი უფრო პრემიული კლიენტები არიან და დიდი იმედი მაქვს, რომ ეს ავიარეისები ხელს შეუწყობს მაღალმხარჯველი ტურისტების შემოყვანას საქართველოში“, - განაცხადა „ვია თრეველის“ დირექტორმა ნინო ნამგალაძემ.

„ძალიან მნიშვნელოვანი ინფორმაცია მიიღეს ჩვენმა ოპერატორებმა დღევანდელ პრეზენტაციაზე. British Airways მსოფლიოს ერთ-ერთი წამყვანი ავიაკომპანიაა, რომელიც საშუალებას მოგვცეს ძალიან ბევრი ქალაქი დავფაროთ, მათ შორის აშშ-ში. British Airways-ის შემოსვლა ძალიან შეუწყობს ხელს ტურისტული ნაკადების შემოსვლას, როგორც დიდი ბრიტანეთიდან, ასევე სხვა ქვეყნებიდან საქართველოში“, - ამბობს თეიმურაზ ერგეშიძე „ჰორიზონტ ეირის“ დირექტორი.

ლონდონი-თბილისი-ლონდონის მიმართულებით British Airways პირდაპირ რეგულარულ რეისებს კვირაში 4 სიხშირით შეასრულებს.