,
წყალტუბოში შექმნილი NFT-ი, სახელწოდებით “ეიფორია”, რომელზეც შვედმა არტისტმა, რაიან კუპმანსმა იმუშავა, მსოფლიოს ყველაზე პრესტიჟული სააუქციონო სახლის, Sotheby's-ის აუქციონზე გაიყიდება, - ამის შესახებ არტისტი “ინსტაგრამში” წერს. მისივე თქმით, აუქციონამდე ნამუშევარი, რომელიც ბლოკჩეინზე არის ინტერგრირებული და შესაბამისად, უნიკალურია, Sotheby's-ის პარიზის გალერეაში იქნება გამოფენილი.
ბრიტანულ-ამერიკული სააუქციონო სახლის შეფასებით, “ეიფორია” ციფრული ნამუშევარია, რომლითაც ავტორი მაყურებელს დროის უწყვეტობის, ბუნების აღორძინებისა და არქიტექტურული ლანდშაფტის სოციალურ-ისტორიული ნუიანსების შესახებ უამბობს. მათივე თქმით, ამ ნამუშევრით, რომელიც ფოტოგრაფიისა და ანიმაციის შერეული ტექნიკითაა შესრულებული, რაიან კუპსმანმა მიტოვებული ისტორიული შენობა გააცოცხლა და მას სიურრეალისტური ელფერი შესძინა.
აუქციონი, რომელზეც შვედი არტისტის ნამუშევარი გაიყიდება, უკვე დაწყებულია. სხვათა შორის, “ეიფორია” ერთ-ერთი ყველაზე ძვირად შეფასებული ნამუშევარია კოლექციაში, რომლის გასაყიდი ფასი, სააუქციონო სახლის შეფასებით, 25-დან 35 ათას ევრომდე შუალედში იქნება. აუქციონით დაინტერესებულ პირებს, გადახდა კრიპტოვალუტითაც შეუძლიათ.
ცნობისთვის: “ეიფორია” NFT-ნამუშევრების იმ კოლექციის ნაწილია, რომელსაც ქართველი მკითხველი კარგად იცნობს. გასულ წლის ივნისში, ამ კოლექციაში შემავალი ერთ-ერთ ნამუშევარი ცნობილმა ამერიკელმა მსახიობმა, ჯიმ კერიმ შეიძინა. ის ნამუშევარი, ისევე, როგორც “ეიფორია” წყალტუბოს სანატორიუმთაგან ერთ-ერთის ოთახში არის გადაღებული.
წყარო: https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
