მთაწმინდის რაიონის გამგებელი დავით კირკიტაძე წავკისში, გ. სააკაძის ქუჩის რეაბილიტაციის ბოლო ეტაპის სამუშაოებს გაეცნო.
„ჩვენ, მთაწმინდის რაიონის შემოერთებულ ტერიტორიებზე საგზაო ინფრასტრუქტურის მოწესრიგებას აქტიურად განვაგრძობთ. მიმდინარე წელს უშუალოდ წავკისში სამ ქუჩას ჩაუტარდა რეაბილიტაცია და სააკაძის ქუჩის რეაბილიტაციაც მალე დასრულდება. აქ, უხვი ნალექის პერიოდში ნამდვილად რთული იყო გადაადგილება და ადგილობრივ მცხოვრებლებს დისკომფორტი ექმნებოდათ, თუმცა, ეს პრობლემა მათ სულ მალე მოუგვარდებათ“- განაცხადა დავით კირკიტაძემ.
ამ ეტაპზე, სარეაბილიტაციო მონაკვეთზე მეორე ფენა ასფალტის დაგება მიმდინარეობს, რომელიც სულ 4000 კვ. მ. ფართობზე დაიგება. საგზაო სამუშაოების დაწყებამდე კი, კომპანია „ჯივიპიმ“ შიდა კომუნიკაციები მოაწესრიგა.
სამუშაოებს, მთაწმინდის რაიონის გამგეობის დაკვეთით კონტრაქტორი კომპანია შპს „პარმა“ ასრულებს და ადგილობრივი ბიუჯეტიდან 395 000 ლარია გამოყოფილი.
