,
შეერთებული შტატები უკრაინას უსაფრთხოების დამატებით გარანტიებს არ მისცემს. ამის შესახებ პრეზიდენტმა დონალდ ტრამპმა ოთხშაბათს განაცხადა. მისი თქმით, უკრაინას არავინ დაესხმება თავს მანამდე, სანამ იქ ამერიკა იმყოფება.
ტრამპმა თქვა, რომ უკრაინის უსაფრთხოება უზრუნველყოფილი იქნება ბუნებრივი რესურსების შესახებ ქვეყნებს შორის შეთანხმებით, რომელსაც იგი იმედოვნებს, რომ პარასკევს მოაწერს ხელს უკრაინის პრეზიდენტ ვოლოდიმირ ზელენსკის ვაშინგტონში ვიზიტის დროს.
მისი თქმით, უკრაინასა და რუსეთთან საქმეები „ძალიან კარგად“ მიდის. მან იმედი გამოთქვა, რომ სამშვიდობო შეთანხმება დაიდება.
ასევე ტრამპმა გაიმეორა, რომ უკრაინა არ შეუერთდება ნატოს ალიანსს. მისი სიტყვებით, მოსკოვსაც მოუწევს დათმობებზე წასვლა.
Reuters-ი წერს, რომ გარიგებას, რომლის მიხედვითაც კიევი თავისი მინერალური რესურსებიდან შემოსავლის ნაწილს აშშ-ის მიერ კონტროლირებად ფონდს გადასცემს, მთავარი ადგილი უკავია უკრაინის მცდელობებში, რომ უზრუნველყოს ტრამპის მხრიდან ძლიერი მხარდაჭერა.
აშშ-ის პრეზიდენტმა დაადასტურა, რომ ზელენსკი პარასკევს ეწვევა ვაშინგტონს, რათა ხელი მოაწეროს შეთანხმებას იშვიათ მიწათა ლითონებისა და სხვა თემების შესახებ. ამასთან, ტრამპმა აღნიშნა, რომ შეერთებული შტატები არ გეგმავს უკრაინის უსაფრთხოების შორსმიმავალი გარანტიების უზრუნველყოფას.
კიევი ცდილობს მოიპოვოს აშშ-ის უსაფრთხოების გარანტიები, როგორც ნაწილი გარიგებისა, რომელსაც ტრამპი უწოდებს ომში ამერიკის დახმარების საფასურს.
ზელენსკის თქმით, ყველაზე მნიშვნელოვანი ის არის, რომ ამჟამინდელ პროექტში უკრაინა არ იყოს წარმოდგენილი როგორც მოვალე, რომელსაც ასობით მილიარდი დოლარის დაბრუნება მოუწევს წარსული სამხედრო დახმარებისთვის.
25 თებერვლით დათარიღებული შეთანხმების პროექტში, რომელიც Reuters-მა მოიპოვა, ნათქვამია: „აშშ-ის მთავრობა მხარს უჭერს უკრაინის ძალისხმევას, მიიღოს უსაფრთხოების გარანტიები, რომლებიც აუცილებელია ხანგრძლივი მშვიდობის დამყარებისთვის“.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
