ჯანდაცვის მინისტრობის კანდიდატის, ეკატერინე ტიკარაძის თქმით, საქართველოში, მოსახლეობის 20%-ისთვის საჭირო ვაქცინა 2021 წლის თებერვალ-მარტში ჩამოვა. ამის შესახებ ტიკარაძემ კომიტეტების ერთობლივ სხდომაზე, მინისტრობის კანდიდატების მოსმენისას განაცხადა.

ტიკარაძის თქმით, საქართველოს ვაქცინების გლობალურ ალიანსთან ხელშეკრულება უკვე გაფორმებული აქვს, რომლის მიხედვითაც ქვეყანა თავად შეძლებს ვაქცინის შერჩევას და დროულად მიღებას:

“სექტემბერში სამინისტრომ კოვაქს პლატფორმასთან გააფორმა ორმხრივი ვალდებულების ხელშეკრულება, რომელიც წარმოადგენს საქართველოს მთავრობისა და ვაქციების გლობალურ ალიანსს შორის შეთანხმებას ახალი კორონავირუსის საწინააღმდეგო ვაქცინის შესყიდვაში დახმარების თაობაზე. შეთანხმებულია მოსახლეობის 20%-ის ვაქცინაციისთვის საჭირო ოდენობის მოწოდება მომდევნო წლის თებერვალ-მარტში. ამისთვის ქვეყანამ უკვე გადარიცხა 16 მილიონი ლარი და შედეგად მივიღებთ ვაქცინის შერჩევის და დროულად მიღების უფლებას”, – განაცხადა ტიკარაძემ.

ამ დროისთვის ევროპისა და აშშ-ის მარეგულირებლებს მხოლოდ ორი – Pfizer-ისა და Moderna-ს ვაქცინები – აქვთ დამტკიცებული.