აშშ-ის პრეზიდენტის ადმინისტრაციის თანახმად, „თანამდებობაზე მოსვლის შემდეგ, პრეზიდენტმა ტრამპმა შექმნა 345 ათასი სამუშაო ადგილი. მათ შორის 188 ათასი (54%) არასამთავრობო და მთავრობის მომიჯნავე სექტორებზე მოდის. ეს არის დრამატული გაუმჯობესება ბაიდენის ადმინისტრაციის ბოლო ორი წლის მდგომარეობასთან შედარებით, როცა ყველა ახალი სამუშაო ადგილის სამი მეოთხედი სამთავრობო ან მთავრობის მომიჯნავე სექტორებზე მოდიოდა“, - ვკითხულობთ თეთრი სახლის მიერ გამოქვეყნებულ დოკუმენტში, რომელშიც აგრეთვე აღნიშნულია, რომ ახალ სამუშაო ადგილებს შორის 27 ათასი მშენებლობის სექტორში შეიქმნა, 9000 - საწარმოო სექტორში. ვეტერანებს შორის უმუშევრობის დონე 0,4%-ით შემცირდა. 228 ათასი სამუშაო ადგილი მხოლოდ მარტში შეიქმნა და ეს იყო ბოლო ორი წლის განმავლობაში მეოთხე საუკეთესო თვე კერძო სექტორში ხელფასის ზრდის მხრივ.
თეთრი სახლის ცნობით, ტრამპის პრეზიდენტობის პირველი ასი დღის განმავლობაში ფედერალურ უწყებებში დისტანციურად მომუშავეთა რაოდენობა გასული წლის მარტთან შედარებით, 2025 წლის მარტში 16 პროცენტული პუნქტით დაეცა, „რაც აჩვენებს ფედერალური უწყებების მუშაკთა ოფისებში დაბრუნების შესახებ პრეზიდენტ ტრამპის ინიციატივის წარმატებას“.
ტრამპის ადმინისტრაციის წერილში მოყვანილია ინფლაციის მონაცემები, მათ შორის შემდეგი ინფორმაცია:
- რეცეპტით გასაცემი წამლების ფასები 2%-ზე მეტით დაეცა;
- გასულ თვეში ასეთი წამლების ფასი ისტორიულად ყველაზე მეტად შემცირდა;
- ბენზინის ფასი, სამომხმარებლო ფასის ინდექსით (CPI), 7%-ით შემცირდა, ტრამპის პრეზიდენტობის დაწყებიდან დღემდე;
- ენერგიაზე ფასები შემცირდა 2%-ით;
- კვერცხზე საბითუმო ფასი დაახლოებით 50%-ით შემცირდა. მომხმარებელთა უმრავლესობამ უკვე იგრძნო ფასებზე შეღავათი საცალო ქსელშიც, ყველა მათგანი იგრძნობს ამას შემდგომ ორ თვეში.
ტრამპის პრეზიდენტობის პერიოდის ინფლაციის მონაცემები შედარებულია ბაიდენის პრეზიდენტობის დროინდელ მონაცემებს. მათ შორის აღნიშნულია ის, რომ “მწვავე ინფლაციის შედეგად, პრეზიდენტ ბაიდენის პრეზიდენტობის ვადაში რეალური ხელფასები 2,4%-ით შემცირდა”.
თეთრი სახლის თანახმად, საქონელზე საბითუმო ფასები თითქმის 1%-ით შემცირდა, სერვისებზე საბითუმო ფასები კი 0,2%-ით, რაც "საბოლოოდ სამომხმარებლო ფასების დაწევაში აისახება".
სხვა ეკონომიკურ მონაცემებს შორის ნაჩვენებია ახალი ინვესტიციების მოცულობაც. ტრამპის ადმინისტრაციის თანახმად, როგორც უცხო ქვეყნების მთავრობების, ისე კერძო კომპანიების მიერ აშშ-ში მინიმუმ 5 ტრილიონი აშშ დოლარის ინვესტიციის განზრახვა გამოცხადდა.
აშშ-ის ტარიფები აღარ გავრცელდება სმარტფონებზე, კომპიუტერებსა და ჩიპებზე
ეკონომიკური პოლიტიკის გადაწყვეტილებებს შორის დასახელებულია ტრამპის ადმინისტრაციის მიერ “10-დან 1-მდე დერეგულაციის აგრესიული ინიციატივის განხორციელება, რომლის თანახმადაც, როცა უწყება ახალი წესის ან სახელმძღვანელო დოკუმენტის შემოღების ინიციატივას წარმოადგენს, მან უნდა გააუქმოს ათი არსებული წესი ან სახელმძღვანელო დოკუმენტი. ეს ძალისხმევა აძლიერებს პრეზიდენტ ტრამპის პირველი ვადის დროს წარმოდგენილ წარმატებულ დერეგულაციურ ინიციატივას, რომელიც ითვალისწინებდა ერთი ახალი წესის სანაცვლოდ, მინიმუმ ორი არსებული რეგულაციის გაუქმებას, რამაც პრაქტიკაში შედეგად მოიტანა 5,5 წესის გაუქმება ყოველი ახალი მნიშვნელოვანი წესის შემოღებისას“.
თეთრი სახლი იუწყება, რომ პრეზიდენტობის დაწყებიდან დღემდე პრეზიდენტმა ტრამპმა გამოსცა 20-ზე მეტი მნიშვნელოვანი დერეგულაციური საპრეზიდენტო გადაწყვეტილება (მაგალითად, აღმასრულებელი ბრძანება, საპრეზიდენტო მემორანდუმი და საპრეზიდენტო განკარგულება).
