სროლას ტენესის შტატის ქალაქ ნეშვილის ერთ-ერთ სკოლაში სამი ბავშვი და სამი ზრდასრული ემსხვერპლა. ამის შესახებ BBC წერს.
დაღუპულია თავდასხმაში ეჭვმიტანილიც. პოლიციამ თავდამსხმელი შემთხვევის ადგილზევე მოკლა. გაირკვა, რომ ის 28 წლის ოდრი ჰეილია, რომელიც, იდენტიფიცირებულია, როგორც ტრანსგენდერი. გავრცელებული ცნობით, სასწავლებელში ის სამი იარაღით აღჭურვილი შევიდა. თავდასხმის მოტივი ჯერ დაუდგენელია.
აშშ-ის პრეზიდენტის, ჯო ბაიდენის განკარგულებით, თეთრ სახლსა და სხვა სამთავრობო შენობებზე, ტენესის შტატის ქალაქ ნეშვილის სკოლაში მომხდარი სროლის მსხვერპლთა მიმართ პატივისცემის ნიშნად, პარასკევამდე დროშები დაეშვება.
პრეზიდენტმა შეიარაღებული ძალადობის შესაჩერებლად კონგრესს თავდასხმითი იარაღის აკრძალვის დამტკიცებისკენ მოუწოდა.
CNN-ის ინფორმაციით, მოკლული სამივე ბავშვის ასაკი 9 წელია.
სამართალდამცავების ინფორმაციით, თავდამსხმელი 28 წლის ქალი, ამავე სკოლის ყოფილი მოსწავლეა.