„მსოფლიო ბაზარზე წყლის ბიზნესში ძალიან დიდი კონკურენცია პროდუქტის ღირებულებიდან გამომდინარეობს. დიდ კომპანიებს წყლის ბიზნესი იმდენად ოკუპირებული აქვთ, რომ მათი ჩანაცვლება ძალიან რთულია. ზოგიერთ ქვეყანა, მაგალითად თურქეთი თავის წარმოებებს ექსპორტზე სუბსიდირებასაც უკეთებენ, რომ დიდი მოცულობით წყალი გაიტანონ. მსოფლიოში მოთხოვნილება წყალზე დიდია, მაგრამ კონკურენცია ფასებშია. ზოგიერთი დიდი კომპანია უფრო ძვირად ყიდის წყალს რადგან მათი მომხმარებლის მხრიდან დიდი ნდობით სარგებლობს.

მიუხედავად იმისა, რომ ვამაყობთ იმით, რომ საქართველო წყლის ქვეყანაა, ჩვენი წყალი საერთაშორისო ბაზარზე იაფი არ არის. ცოტა ძვირია წყალი ჩვენთან. ჩვენი წყალი ფასით კონკურენტუნარიანი არ არის, რადგან რაღაც საქონელი - ნედლეული და ა.შ. უცხოეთიდან შემოგვაქვს და მასზე ვართ დამოკიდებული. საერთაშორისო ბაზარზე კი წყლის ხარისხთან და ნდობასთან ერთად ფასს ძალიან დიდი მნიშვნელობა აქვს“, - ამბობს „კოკა-კოლა ბოთლერს ჯორჯიას“ დამფუძნებელი თემურ ჭყონია.

მისი შეფასებით, მსოფლიოში წყლის მწარმოებელი წამყვან კომპანიებთან კონკურენციაში შესვლა რთულია, რადგან მათ ხარისხთან ერთად მომხმარებლის ნდობაც აქვთ მოპოვებული.

თუმცა მაღალი კონკურენციის მიუხედავად „კოკა-კოლა ბოთლერს ჯორჯიას“ მენეჯმენტი, მაინც გეგმავს წყალი „მთის“ აზერბაიჯანის ბაზარზე შეტანას და იქ Bon Aqua-ს ადგილის დაკავებას. მიზნის მიღწევას თემურ ჭყონია აზერბაიჯანში „კოკა-კოლას“ მწარმოებელთან თანამშრომლობით აპირებს, რომელიც ქვეყანაში წლიურად 15 მლნ ბოთლი Bon Aqua-ს ყიდის, რაც აზერბაიჯანში წყალზე არსებული მოთხოვნის 10-15%-ს შეადგენს.

2021 წელს საქართველომ მინერალური და მტკნარი წყლის ექსპორტით 141.8 მლნ დოლარის შემოსავალი მიიღო, რაც გასული წლის საექსპორტო მაჩვენებელს 21.6%-ით აღემატება. მინერალური და მტკნარი წყლები  საექსპორტო საქონლის 10-ეულში 3.3%-იანი წილით მეექვსე ადგილი უკავია.