საქართველოს კულტურისა და სპორტის მინისტრი თეა წულუკიანი ანსამბლ „მძლევარს“ ესტუმრა და მათი 30 წლის საქმიანობის ანგარიში მოისმინა.
შემაჯამებელი ანგარიში ანსამბლ „მძლევრის“ სამხატვრო ხელმძღვანელმა კახა ონაშვილმა წარადგინა. ანსამბლის წევრებმა წარმოადგინეს როგორც ქართული ფოლკლორის ნიმუშები, ისე უცხოური სიმღერები. ინფორმაციისთვის: „მძლევარი” კერძო ანსამბლს წარმოადგენს და იგი კულტურის სამინისტროს მმართველობის სფეროში არ იმყოფება.
მინისტრმა ანსამბლის ხელმძღვანელობასთან ერთად სამომავლო გეგმები და თანამშრომლობის საკითხებიც განიხილა, ანსამბლის წევრებს კი მადლობა გადაუხადა მათი შრომისათვის და წარმატებები უსურვა.
აღსანიშნავია, რომ ამა წლის მაისში საქართველოს კულტურისა და სპორტის სამინისტროს მხარდაჭერით ჯანსუღ კახიძის სახელობის თბილისის მუსიკალურ-კულტურულ ცენტრში ანსამბლის 30 წლის იუბილესადმი მიძღვნილი კონცერტი გაიმართა, თბილისის სახელმწიფო საკონცერტო დარბაზის წინ კი „მძლევრისა“ და მისი დამფუძნებლის, ტარიელ ონაშვილის, ვარსკვლავი გაიხსნა.
ქართლ-კახური სიმღერების დიდოსტატმა სოლისტ-შემსრულებელმა ტარიელ ონაშვილმა და მისმა ვაჟმა კახა ონაშვილმა მიზნად დაისახეს ქართული სიმღერის სამსახური და 1994 წელს სწორედ მათი ხელმძღვანელობით ჩამოყალიბდა ბიჭების ფოლკლორული გუნდი „მძლევარი“, რომელშიც ორმოცდაათზე მეტი ყმაწვილი ეუფლება ქართულ სიმღერას.
არსებობის მანძილზე „მძლევარმა“ ბევრი გამარჯვება მოიპოვა და ერთ-ერთი საუკეთესო გუნდის რეპუტაციაც დაიმკვიდრა. მიღწევათა შორის აღსანიშნავია რესპუბლიკურ ფესტივალ „ოქროს მართვეს“ პირველი ხარისხის დიპლომი, პირველ მსოფლიო საყმაწვილო დელფიადაში მონაწილეობა, თბილისის ფოლკლორულ ფესტივალზე, საქართველოს ფოლკლორული სიმღერების ფესტივალსა და ფესტივალზე „მომავალი ხმები“ პირველი ადგილის მოპოვება, მოსკოვის სააღდგომო ფესტივალის ლაურეატობა, პრიზი მაღალსაშემსრულებლო ოსტატობისთვის პომორიეს (ბულგარეთი) მართლმადიდებლური ხმების ფესტივალზე, წარმატებული გამოსვლები მაკედონიაში, ლატვიაში, საბერძნეთში, პოლონეთში, ეგვიპტეში, გერმანიაში, შვეიცარიასა და სხვა ქვეყნებში.
„მძლევრის“ რეპერტუარში სხვადასხვა მხარის, ჟანრისა და სირთულის ვოკალურ-საკრავიერი მუსიკის 200-ამდე ნიმუშია, რაც საინტერესოდ წარმოაჩენს ქართულ მუსიკალურ ფოლკლორს.
სხვადასხვა საგუნდო ფესტივალში აქტიურმა მონაწილეობამ ანსამბლის რეპერტუარი პროფესიული და საგუნდო მუსიკის ნიმუშებით გაამდიდრა, რამაც განაპირობა მისი კლასიკურ აკადემიურ საგუნდო კოლექტივად ჩამოყალიბება.
სიმღერა-საგალობლებთან ერთად ანსამბლის რეპერტუარშია ქართველი კომპოზიტორების: ნიკო სულხანიშვილის, ოთარ თაქთაქიშვილის, იოსებ კეჭაყმაძის, მამია ხატელიშვილის, ვახტანგ კახიძის, მიშა მდინარაძის, ნანა გველესიანის, ლილიკო ნემსაძისა და თამარ სალუქვაძის ნაწარმოებები.
