,
მცდარია მოსაზრება, რომ სოხუმი დიალოგისთვის არის მზად და თბილისი არ პასუხობს - ეს არის მცადრი, - ამის შესახებ შერიგებისა და სამოქალაქო საკითხებში სახელმწიფო მინისტრმა თეა ახვლედიანმა პარლამენტში მოსმენისას განაცხადა.
მისივე თქმით, საქართველოს ხელისუფლებას აფხაზებთან დიალოგი არასდროს შეუწყვეტია.
„უმაღლეს დონეზე, მრავალჯერ, ზუსტად იმავე საჯარო სივრცეში და იმავე გზით არაერთხელ განვაცხადეთ, რომ ამ დიალოგისთვის მზად ვართ. დეპოლიტიზირებულ თემებზე, ორივე საზოგადოების საერთო ინტერესში შემავალ საკითხებზე, ნებისმიერ დროს, ადგილზე, დონეზე - ეს განვაცხადეთ მრავალჯერ, როგორც საქართველოს პრეზიდენტმა, ასევე პრემიერ -მინისტრმა, მე და სხვა კოლეგებმა ვთქვით არაერთხელ, საჯაროდ. ძალიან ბედნიერი ვიქნები, რომ ეს შეკითხვები მოიხსნას. საქართველოს ხელისუფლებას არასდროს შეუწყვეტია დიალოგი აფხაზებთან და ამ შედეგებს აქვს კონკრეტული სახელი. ხშირ შემთხვევაში, არაფორმალურ კომუნიკაციასა და დიალოგს მოჰქონდა გადამწყვეტი შედეგი. ხშირ შემთხვევაში, გვახსოვს, რომ აფხაზეთის ყოფილი დე-ფაქტო ხელისუფლების წარმომადგენლებისგანაც არაერთხელ იყო გაჟღერებული მსგავსი დიალოგის მზაობა, თუმცა, მათ შედეგი არ მოყოლიათ. მიუხედავად ყველაფრისა, დიდი სურვილი მექნებოდა, რომ სულ ცოტა ფართო საზოგადოებას თუ არა, აქ დამსწრე კოლეგებში მოიხსნას ეს საკითხი, შევხვდეთ უახლოეს მომავალში, დახურულ ფორმატში და გულწრფელად განვიხილოთ ეს საკითხი. მიუხედავად ნებისმიერი გარემოებისა, რომელიც შეიძლება ჩანდეს, რომ ამ დიალოგს უშლის ხელს, კიდევ ერთხელ სრული პასუხისმგებლობით ვაცხადებ, რომ საქართველოს ხელისუფლება არის მზად კონკრეტული გზებიც განვიხილოთ როგორ შეიძლება მაშინ ისეთი დიალოგი ვაწარმოოთ, რომელიც ჩაითვლება დიალოგად, ამ გზებზეც ვმუშაობთ“, - განაცხადა ახვლედიანმა.
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
