,
ავარიული მრავალბინიანი საცხოვრებელი სახლების ჩანაცვლების პროექტის ფარგლებში, კიდევ ერთი პროექტი სამგორის რაიონში, კერძოდ ვარკეთილის დასახლების მესამე მასივში, მე-4 კვარტალში ხორციელდება. მალე N6 კორპუსის მობინადრეები იმავე მისამართზე, ახალ საცხოვრებელ სახლში იცხოვრებენ.
მიმდინარე პროექტს დღეს დედაქალაქის მერი კახა კალაძე მის მოადგილესთან, ირაკლი ბენდელიანთან ერთად გაეცნო.
დედაქალაქის მერის თქმით, კონკრეტულ მისამართზე მიმდინარე პროექტი 2026 წელს დასრულდება.
„სამგორის რაიონში, მესამე მასივში მიმდინარეობს კიდევ ერთი ავარიული კორპუსის ჩანაცვლების პროექტი. რაც შეეხება მრავალბინიანი ავარიული საცხოვრებელი სახლების ჩანაცვლების პროგრამას, ამის შესახებ პირველად 2021 წელს განვაცხადეთ. პირველი, რაც გავაკეთეთ - მოვიკვლიეთ და დავადგინეთ, რომ მთელი ქალაქის მასშტაბით 10 000-მდე ასეთი შენობა-ნაგებობაა. მათ სხვადასხვა კატეგორიის ავარიულობის სტატუსი აქვთ. ამის შემდეგ წარვუდგინეთ საზოგადოებას პროგრამა, რომლითაც ვეხმარებით ასეთ შენობა-ნაგებობებში მცხოვრებ ოჯახებს. ხორციელდება ძველი საცხოვრებლის დემონტაჟი და მის ნაცვლად შენდება თანამედროვე, ქართული არქიტექტურის მქონე კორპუსი. რაც ყველაზე მნიშვნელოვანია, ამ ოჯახებს გადაეცემათ გარემონტებული ბინები. სანამ სამშენებლო სამუშაოები მიმდინარეობს, იქამდე ქირით გვყავს გაყვანილი ისინი და ყველა ხარჯს მუნიციპალიტეტი იღებს საკუთარ თავზე. როდესაც პროექტი დასრულდება, ამ ადამიანებს გადაეცემათ გარემონტებული საცხოვრებელი ფართები. ვაგრძელებთ ამ მიმართულებით მუშაობას და ჩვენი მიზანია, რაც შეიძლება მეტი ადამიანი გავაბედნიეროთ, მეტ მათგანს დავუდგეთ გვერდით და მეტი ავარიული კორპუსი ჩავანაცვლოთ“, - განაცხადა კახა კალაძემ.
ადგილზე ასევე იმყოფებოდნენ თბილისის განვითარების ფონდის ხელმძღვანელი თამაზ ალიბეგაშვილი და სამგორის რაიონის გამგებელი კახა სამხარაძე.
საცხოვრებელი სახლის სამშენებლო და სარემონტო სამუშაოების შესყიდვის მიზნით, მიმდინარე წლის 21 მაისს გაფორმდა ხელშეკრულება გამარჯვებულ კომპანიასთან ,,ბკ ქონსთრაქშენთან“. აღნიშნულ მისამართზე, ავარიული 4-სართულიანი სახლის ნაცვლად, აშენდება 10-სართულიანი თანამედროვე სტანდარტების შენობა-ნაგებობა. პირველ სართულზე მოეწყობა 451 კვ.მ კომერციული ფართი, ხოლო მეორე სართულიდან მეათე სართულის ჩათვლით განთავსდება 79 საცხოვრებელი ბინა. 36 სრულად გარემონტებული ბინა გადაეცემათ უძრავი ქონების მესაკუთრეებს, ჯამში: 2234 კვ.მ, ხოლო 43 ბინა მონაწილეობს ნატურით ანგარიშსწორებაში, საერთო ფართით: 2534 კვ.მ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
