,
თბილისში იუნესკოს წიგნის მსოფლიო დედაქალაქების ქსელის მორიგი შეხვედრა გაიხსნა. შეხვედრა თბილისის მერის მოადგილე, ანდრია ბასილაიამ გახსნა.
„2021 წელს, „თბილისი - წიგნის მსოფლიო დედაქალაქის“ ფარგლებში განხორციელებული პროექტები ჩვენი ქალაქის, ქვეყნისა და საზოგადოებისთვის უაღრესად მნიშვნელოვანი აღმოჩნდა. მადლობას ვუხდი იუნესკოს, რომელმაც მისი განხორციელება გვანდო და სამუდამოდ დაგვიტოვა წიგნის ერთ-ერთი დედაქალაქის სტატუსი. დარწმუნებული ვარ, რომ ქსელის შეხვედრები ახალი იდეებისა და გამოწვევების დასაწყისი იქნება. თბილისის მერია და მთელი ჩვენი გუნდი ამ პროექტის დიდი მხარდამჭერები ვართ და მომავალშიც გავაგრძელებთ თანამშრომლობას. მადლობას მოვახსენებ სტუმრობისთვის ქსელის ყველა წევრი ქალაქის წარმომადგენელს, ხოლო 2024 წლის წიგნის მსოფლიო დედაქალაქს, სტრასბურგს წარმატებას ვუსურვებ“, - აღნიშნა მისასალმებელ სიტყვაში თბილისის მერის მოადგილე ანდრია ბასილაიამ.
ქსელის შეხვედრის მონაწილეებს ასევე მიესალმნენ იუნესკოს წიგნის მსოფლიო დედაქალაქის პროექტის ხელმძღვანელი, იან დენისონი და თბილისის მულტიფუნქციური ბიბლიოთეკების გაერთიანებისა და პროექტ „თბილისი - წიგნის მსოფლიო დედაქალაქის“ დირექტორი, ნინია მაჭარაშვილი.
„აღნიშნული შეხვედრა საშუალებას მოგვცემს დავგეგმოთ მნიშვნელოვანი საერთაშორისო ინიციატივები 2024-25 წლების განმავლობაში, რაც განავითარებს წიგნის სფეროს, ხელს შეუწყობს საზოგადოებაში წიგნიერების დონის ამაღლებასა და დაეხმარება მოწყვლად ჯგუფებს, რათა ჰქონდეთ ინფორმაციისა და განათლების მიღების თანაბარი შესაძლებლობა. ქსელის წევრი ოცი ქალაქის წარმომადგენელთა ვიზიტი, დამატებით, ახალ კარს გახსნის ქვეყნისა და ქართული ლიტერატურის პოპულარიზაციისთვის“, - აღნიშნა თბილისის მულტიფუნქციური ბიბლიოთეკების გაერთიანებისა და პროექტ „თბილისი - წიგნის მსოფლიო დედაქალაქის“ დირექტორმა, ნინია მაჭარაშვილმა.
ქსელის შეხვედრას ესწრებიან პროექტის გასული წლების მასპინძელი ოცი ქალაქის წარმომადგენლები, რომლებიც ერთმანეთს გააცნობენ გაწეული სამუშაოების ანგარიშს, განიხილავენ ახალ გამოწვევებს, მათი გადაჭრის მეთოდებს, სამომავლო პარტნიორობას, დაფინანსების მოპოვების გზებსა და სხვა საკითხებს. დაგეგმილი პროგრამები წარმოადგინეს 2024 წლის წიგნის მსოფლიო დედაქალაქ სტრასბურგიდან და რიო დე ჟანეიროდან ჩამოსულმა სტუმრებმა. ეს უკანასკნელი პროექტს 2025 წელს უმასპინძლებს.
იუნესკოს წიგნის მსოფლიო დედაქალაქების ქსელის შეხვედრას თბილისი მეორედ მასპინძლობს. პირველი შეხვედრა 2022 წლის აპრილში გაიმართა, როდესაც თბილისმა „წიგნის მსოფლიო დედაქალაქის“ პროექტი დაასრულა. 2023 წელს, პოლონეთის ქალაქ ვროცლავში გამართული შეხვედრისას, თბილისმა სხვა ქალაქებთან ერთად აიღო ქსელის წევრობისა და მისი განვითარების პასუხისმგებლობა, რაც ერთობლივ ქარტიაზე ხელის მოწერითაც დაადასტურეს. თბილისის მერიის მიერ მხარდაჭერილ პროექტს ჩვენი დედაქალაქი 2021 წლის 23 აპრილიდან მასპინძლობდა. ერთი წლის განმავლობაში განხორციელდა ასამდე პროექტი, რომლებმაც სრულად მოიცვეს არა მხოლოდ წიგნის სფერო, არამედ საზოგადოების უდიდესი ნაწილიც. განხორციელდა არაერთი საგამომცემლო, ზოგადსახელოვნებო, მულტიმედიური და საერთაშორისო პროექტი.
იუნესკოს მიერ „წიგნის მსოფლიო დედაქალაქის“ პროექტის დაარსებიდან, დღემდე, ამ სტატუსს სხვადასხვა კონტინენტისა და ქვეყნის 25 ქალაქი ატარებდა.
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
