2024 წლის იანვარში ყველაზე მეტი ბინა დიდ დიღომში გაიყიდა. ყველაზე მაღალი ფასი კი, კვლავ ვაკეში დაფიქსირდა.

ახალი წელი თბილისის უძრავი ქონების ბაზარზე საკმაოდ აქტიურად დაიწყო და გაყიდული ბინების რაოდენობამ 2,967 შეადგინა - ამის შესახებ Tbc კაპიტალი საცხოვრებელი უძრავი ქონების ბაზრის მიმოხილვაში წერს.

გასულ თვეს ბაზრის მოცულობა $234 მილიონს გაუტოლდა და წლიურად 11%-ით გაიზარდა. რაც შეეხება გაყიდვების გადანაწილებას უბნების მიხედვით, 2024 წლის იანვარში თბილისში გაყიდული ბინების რაოდენობის მიხედვით დიდი დიღომი (25% მთლიან გაყიდვებში) კვლავ პირველ ადგილზეა, ხოლო რიგით მეორეზე საბურთალო (15%). ახალი ბინების გაყიდვების მნიშვნელოვანი წლიური ზრდით სამგორი გამოირჩა. ახალი ბინების გაყიდვების ყველაზე მაღალი მაჩვენებელი დიდ დიღომში დაფიქსირდა. ძველი ბინების შემთხვევაში, გაყიდვებში წლიური ზრდა დიდ დიღომში, ნაძალადევში, დიდუბესა და გლდანში შეიმჩნევა.

Tbc კაპიტალის ცნობით, იმავე პერიოდში, საშუალო გასაყიდი ფასი კვ.მ-ზე ვაკეში კვლავ $2,000-ის ფარგლებში მერყეობდა. ძველი ბინების შემთხვევაში, ყველა უბანში წლიური ზრდა დაფიქსირდა.

ყველაზე მაღალი ზრდით ჩუღურეთი (+24%), ნაძალადევი (+21%) და გლდანი (+19%) გამოირჩეოდა.