გამორიცხულია, თბილისის მერიამ სამუშაოები მართოს ისე, რომ დროის შემცირების გამო გავაუარესოთ ხარისხი. მერი მთავრობის სხდომაზეც და საზოგადოებასთან კომუნიკაციის დროსაც მუდმივად საუბრობს იმაზე, რომ ხარისხზე ორიენტირებულია ჩვენი სარეაბილიტაციო სამუშაოები. სწრაფად გაკეთება რომ გვინდოდეს, 8-9 თვე არ მოვანდომებდით წერეთლის გამზირის რეაბილიტაციას, ავყრიდით ასფალტს და დავაგებდით ძალიან მალე ახალს. ხარისხიანად რომ უნდა შესრულდეს და ათობით წელს გაუძლოს ამ სარეაბილიტაციო სამუშაოებმა, სწორედ ამიტომ დასჭირდა დიდი დრო, - ამის შესახებ „ქრონიკის“ ეთერში თბილისის ვიცე-მერმა, ირაკლი ხმალაძემ განაცხადა.
„ყველაფერი ისეა, როგორც დღეს დედაქალაქის მერმა თქვა და როგორც აქამდე გვითქვამს - იანვრის ბოლომდე სამუშაოები დასრულდება და 1 თებერვლიდან სატრანსპორტო მოძრაობა ორმხრივად აღდგება. ცხადია, ეს არ ეხება ბოლო ეტაპების სამუშაოებს - გაგრძელდება გარკვეული კეთილმოწყობის სამუშაოები, რომლებიც სატრანსპორტო ნაკადებს არ შეაფერხებს. ქვეითთა სივრცეებში სამუშაოები გაგრძელდება, ისევე როგორც გამწვანების სამუშაოები, რასაც გარკვეული დრო კიდევ დასჭირდება - მარტში დასრულდება ეს პროცესი. დღეს დღის ბოლომდე მოძრაობის აღდგენისთვის საჭირო ყველა სამუშაო დასრულდება და ხვალიდან წერეთლის გამზირზე მოძრაობა ორმხრივად აღდგება. გამორიცხულია, თბილისის მერიამ სამუშაოები მართოს ისე, რომ დროის შემცირების გამო გავაუარესოთ ხარისხი. მერი მთავრობის სხდომაზეც და საზოგადოებასთან კომუნიკაციის დროსაც მუდმივად საუბრობს იმაზე, რომ ხარისხზე ორიენტირებულია ჩვენი სარეაბილიტაციო სამუშაოები. სწრაფად გაკეთება რომ გვინდოდეს, 8-9 თვე არ მოვანდომებდით წერეთლის გამზირის რეაბილიტაციას, ავყრიდით ასფალტს და დავაგებდით ძალიან მალე ახალს. ხარისხიანად რომ უნდა შესრულდეს და ათობით წელს გაუძლოს ამ სარეაბილიტაციო სამუშაოებმა, სწორედ ამიტომ დასჭირდა ამას დიდი დრო. კიდევ ერთხელ მინდა დაგიდასტუროთ, რომ კომპანიების მხრიდან ნამდვილად ჰქონდა ადგილი ხელშეკრულებიდან გადახრებს. ეს მიუღებელი იყო ჩვენთვის და ჩვენ დროულად მივიღეთ საჭირო ზომები, რათა არ დაგვერღვია გაცემული დაპირებები და ვადები. შესაბამისად, დაპირებულ დროში დაპირებული ხარისხით სამუშაოები დასრულდება. საქვეითო სივრცეები, ტროტუარები, გამწვანების სამუშაოები, გაჩერებები, ნაგავშემკრები კონტეინერების დასრულება - ყველაფერი გათვალისწინებულია მარტის თვეში, როცა შევძლებთ ვთქვათ, რომ დავასრულეთ წერეთლის გამზირზე სარეაბილიტაციო სამუშაოები“, - აღნიშნა ირაკლი ხმალაძემ.