,
ინფრასტრუქტურის მინისტრი, რევაზ სოხაძე განმარტავს, რომ თბილისის შემოვლითი გზის 48- კილომეტრიან მონაკვეთზე სატენდერო პროცედურები 2025 წელს დაიწყება, ხოლო გზის ნაწილის მშენებლობის დაწყება 2026 წლის ბოლოსთვისაა დაგეგმილი.
როგორც მან პარლამენტში, ინტერპელაციის წესით მოსმენისას აღნიშნა, გზის ნაწილის მშენებლობა ბიუჯეტის დაფინანსებით მოხდება, ნაწილს კი დონორები დააფინანსებენ.
„თბილისის შემოვლითი გზის მშენებლობა 4 ლოტად არის დაყოფილი და ჯამში 48 კმ-ს შეადგენს. თითოეულ ლოტზე დეტალური პროექტი მომზადებულია. 2025 წელს დაიწყება სატენდერო პროცედურები ლოტი #2-სა და ლოტი #3-ზე. ლოტი #2 და ლოტი #3 ეს არის წიწამურიდან უკვე ახალი მაგისტრალის მშენებლობა. #3 კი ეს არის უკვე ძველი რკინიგზის დაუმთავრებელი მშენებლობის ხაზს, რომელიც გააგრძელებს ის მიმართულება. ხოლო ლოტი #4-სა და ლოტი #5-ზე 2026 წლის ბოლოს უკვე დავიწყებთ სამშენებლო სამუშაოებს. ეს უკვე არის ლილოს კვანძი და ლოჭინის კვანძი. აქ ჩვენ დონორებთან ვმუშაობთ და დონორების მიერ მოხდება აღნიშნული მე-4 და მე-5 ლოტის დაფინანსება. ხოლო მე-2 და მე-3 ლოტს ბიუჯეტის სახსრებით გავაკეთებთ“, - განაცხადა რევაზ სოხაძემ.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
