,
თბილისის საკრებულოს თავმჯდომარემ გიორგი ტყემალაძემ განათლებისა და კულტურის კომისიის თავმჯდომარესთან, კახაბერ ლაბუჩიძესთან ერთად, სსიპ რელიგიის საკითხთა სახელმწიფო სააგენტოსთან ურთიერთთანამშრომლობის მემორანდუმი გააფორმა. სააგენტოს მხრიდან მემორანდუმს ხელი ამავე სააგენტოს თავმჯდომარემ ზაზა ვაშაყმაძემ მოაწერა.
შეთანხმების თანახმად, მემორანდუმი მხარეებს შორის თანამშრომლობის გაღრმავებას ითვალისწინებს, რაც გულისხმობს დედაქალაქის საკრებულოში დასაქმებულ პირთათვის სეკულარიზმისა და რელიგიური ნეიტრალიტეტის პრინციპების განმტკიცებასთან დაკავშირებული ერთობლივი სატრენინგო, სასემინარო პროგრამების შემუშავებასა და სერტიფიკატების გაცემას.
"რელიგიის საკითხთა სახელმწიფო სააგენტოსთან თანამშრომლობით გვსურს, მუნიციპალიტეტში დასაქმებული პირებისთვის სეკულარიზმისა და რელიგიური ნეიტრალიტეტის საკითხებში საგანმანათლებლო პროგრამების დანერგვა. ვფიქრობთ, სააგენტოსთან ამ ტიპის თანამშრომლობა მნიშვნელოვანია თბილისის რელიგიურ-კულტურული მემკვიდრეობის დაცვისა და განვითარებისთვის. ასევე გვსურს, ეს მემორანდუმი, სახელმწიფო უწყებებს შორის თანამშრომლობის წარმატებულ და სანიმუშო პროექტად ვაქციოთ", - განაცხადა კახა ლაბუჩიძემ.
მემორანდუმი ასევე ითვალისწინებს იმ პროგრამებისა და პროექტების შემუშავებას, რომლებიც რელიგიურ-კულტურული მემკვიდრეობის დაცვასთან, რელიგიის თავისუფლებასთან და თბილისის რელიგიურ-კულტურულ მრავალფეროვნებასთანაა დაკავშირებული.
მემორანდუმის მიხედვით, მხარეები ერთობლივად უზრუნველყოფენ შესაბამისი სამუზეუმო და ფოტო-ვიდეო მასალების ექსპოზიციასა და ტურისტული მარშრუტების გზამკვლევების გამოცემა-პოპულარიზაციას.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
