,
ივანე ჯავახიშვილის სახელობის თბილისის სახელმწიფო უნივერსიტეტის 105- წლისთავისადმი მიძღვნილი საიუბილეო ღონისძიებების ფარგლებში დღეს დედაქალაქის საკრებულომ 19 ქვეყნის 41 უნივერსიტეტის წარმომადგენლებს უმასპინძლა. შეხვედრაზე, რომელიც უმრავლესობის წევრის, ნინო რუხაძის, ინიციატივით გაიმართა, უმაღლეს საგანმანათლებლო დაწესებულებებსა და მუნიციპალიტეტს შორის თანამშრომლობაზე ისაუბრეს. სხვადასხვა ქვეყნის უნივერსიტეტების წარმომადგენლები თბილისს პერსონალის მეხუთე საერთაშორისო კვირეულის ფარგლებში ეწვივნენ. სტუმრებს სიტყვით საკრებულოს თავმჯდომარის მოადგილემ თინათინ ნიბლოშვილმა და უმრავლესობის წევრმა ნინო რუხაძემ მიმართეს.
როგორც ნინო რუხაძემ განაცხადა, დედაქალაქის მუნიციპალიტეტი თბილისის სახელმწიფო უნივერსიტეტთან აქტიურად თანამშრომლობს და ესთანამშრომლობა მომავალშიც გაგრძელდება.
„დღევანდელი ღონისძიება თსუ-ს 105 წლის იუბილეს ეძღვნება. მოხარული ვარ, რომ მუნიციპალიტეტსა და თსუ-ს შორის ინსტიტუციური თანამშრომლობის საძირკველი ჩაიყარა და ამ მნიშვნელოვან თარიღს ასეთი კარგი ამბით აღვნიშნავთ. ჩვენი თანამშრომლობა წარმატებულია და მომავალშიც გაგრძელდება,“- განაცხადა ნინო რუხაძემ.
თბილისის საკრებულოსა და უმაღლეს საგანმანათლებლო დაწესებულებებს შორის თანამშრომლობის მნიშვნელობაზე საკრებულოს თავმჯდომარის მოადგილემ თინათინ ნიბლოშვილმაც ისაუბრა, რის შემდეგაც სტუმრებს სიტყვით, თსუ-ს ხარისხის უზრუნველყოფის სამსახურის ხელმძღვანელმა ირმა გრძელიძემ მიმართა. ირმა გრძელიძის თქმით, თბილისის სახელმწიფო უნივერსიტეტისა და მუნიციპალიტეტის თანამშრომლობა ძალიან წარმატებულია.
ღონისძიების შემდეგ სტუმრებმა თბილისის საკრებულოს ისტორიული შენობა დაათვალიერეს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
