თბილისის მერიის მოქალაქეთა მომსახურების ცენტრი, ტექნიკური სამუშაოების გამო, საქმიანობას დროებით წყვეტს

Date:

თბილისის მერიის ადმინისტრაციულ შენობაში მიმდინარე ტექნიკური სამუშაობის გამო, 8 ივლისიდან მოქალაქეთა მომსახურების ცენტრი დროებით წყვეტს საქმიანობას.

თბილისის მერიის ინფორმაციით, მოქალაქეები შესაბამის მომსახურებას კონკრეტული მიმართულებების მიხედვით მიიღებენ რამდენიმე რაიონულ სერვის-ცენტრში. კერძოდ: თბილისის მერიის ქონების მართვის სააგენტოს, არქიტექტურის სამსახურის, თბილისის მუნიციპალური ინსპექციის კომპეტენციას მიკუთვნებულ საკითხებთან დაკავშირებით მოქალაქეები მომსახურებას მიიღებენ კოსტავას N72-ში.

რაც შეეხება ჯანდაცვისა და სოციალური მომსახურების, გარემოს დაცვის, ინფრასტრუქტურის განვითარების საქალაქო სამსახურების, ასევე, ტრანსპორტისა და ურბანული განვითარების სააგენტოს კომპეტენციაში არსებულ საკითხებს, მოქალაქეები შესაბამის მომსახურებას მიიღებენ ვაკის რაიონულ სერვის ცენტრში, მისამართზე - თამარაშვილის N10ა და საბურთალოს რაიონულ სერვის ცენტრში, მისამართზე - მიცკევიჩის N20.

ააიპ „ჩემი ადვოკატი“ მოქალაქეებს მოემსახურება ყველა რაიონულ სერვის ცენტრში.

sport

16-წლამდელ ტყვიის მსროლელებმა სადებიუტო ევროპის ჩემპიონატზე თითო ოქროს და ვერცხლის და ორი ბრინჯაოს მედალი მოიპოვეს

ტყვიის სროლაში საქართველოს 16-წლამდეთა ნაკრებისთვის შედეგიანი გამოდგა ტალინის ევროპის ჩემპიონატი. ჩვენმა გუნდმა თითო ოქროს და ვერცხლის და ორი ბრინჯაოს მედალი მოიპოვა.

საქართველოს ნაკრებისთვის ყველაზე წარმატებული გამოდგა ჩემპიონატის დასკვნით დღეს ვაჟთა გუნდური ასპარეზობა - რევაზ ლილუაშვილმა, ლუკა კობახიძემ და სანდრო ხოსიტაშვილმა გადამწყვეტ შეხვედრაში უკრაინას 13:11 მოუგეს და საქართველოს ჰიმნი ააჟღერეს.

სანდრო ხოსიტაშვილმა ჩემპიონატის პირველ დღესაც მოიპოვა მედალი. 10 მეტრზე პნევმატიკური პისტოლეტიდან სროლაში გამოსვლა ვერცხლის მედლით დაასრულა.

საქართველოს ნაკრებისთვის შედეგიანი იყო ჩემპიონატის მეორე დღეც, როდესაც 10 მეტრზე პნევმატიკური პისტოლეტიდან სროლაში ვაჟთა ნაკრებმა (რევაზ ლილუაშვილი, ლუკა კობახიძე, სანდრო ხოსიტაშვილი) გუნდურ ჩათვლაში ბრინჯაო მოიპოვა.

შედეგიანი ასპარეზობა გვქონდა შერეულ წყვილთა თანრიგშიც - ელენე წიკლაურის და სანდრო ხოსიტაშვილის წყვილმა მეორე ადგილი დაიკავა.

აღსანიშნავია, რომ 16-წლამდეთა ევროპის ჩემპიონატი პირველად ჩატარდა. საერთაშორისო კალენდარში ერთგვარ საცდელი ტურნირადაც იყო მონიშნული. გარდა ამისა, სადებიუტო ევროპირველობას ევროპის ზაფხულის ახალგაზრდული ოლიმპიური ფესტივალის საკვალიფიკაციო დატვირთვაც ჰქონდა.

ტალინი 18-წლამდელთა ევროპის ჩემპიონატსაც მასპინძლობდა, სადაც საქართველო ერთი სპორტსმენით, ლიზი აღნიაშვილით იყო წარმოდგენილი, მაგრამ სამწუხაროდ, ამჯერად საპრიზო ადგილის გარეშე დავრჩით.

See all

Survey