,
თბილისის მერიამ 8, 10 და 12-მეტრიანი ავტობუსების მძღოლების ვაკანსია გამოაცხადა.
როგორც თბილისის მერმა დედაქალაქის მთავრობის სხდომაზე აღნიშნა, დაახლოებით 400 მძღოლის ვაკანსია იქნება და მოცემულ ვაკანსიაზე თანამდებობრივი სარგო 2500-3000 ლარამდე შეადგენს.
„შევიძინეთ 180 ერთეული 18-მეტრიანი ავტობუსი. ეს ყველაფერი კეთდება იმისთვის, რომ საზოგადოებრივი ტრანსპორტი გამართულად ფუნქციონირებდეს, ემსახურებოდეს დედაქალაქში მცხოვრებ ადამიანებს და კომფორტულად შეძლონ გადაადგილება. დღეს, რა თქმა უნდა გვაქვს, გამოწვევები და პრობლემები, მიუხედავად იმისა, რომ ბევრი კარგი საქმე გაკეთდა ამ მიმართულებით, თუმცა პროცესი გრძელდება, რადგან აღნიშნული რეფორმა ბევრ მნიშვნელოვან კომპონენტს მოიცავს. მთავარი მიზანი ამ რეფორმის არის ის, რომ საზოგადოებრივი ტრანსპორტი გავხადოთ ყველასათვის ხელმისაწვდომი და კომფორტული. დღეს ვხვდებით, ავტობუსებს რომელიც არის გადაჭედილი. ამას აქვს თავისი ახსნა - მიმდინარეობს პარალელურად ბევრი ინფრასტრუქტურული პროექტი, რადგან მოვაწესრიგოთ ინფრასტრუქტურა და ამ პროექტების განხორციელების დროს გათვალისწინებულია საზოგადოებრივი ტრანსპორტისთვის განკუთვნილი ზოლები.
18-მეტრიანი ავტობუსების შემოყვანა 2024 წლის განმავლობაში ეტაპობრივად მოხდება. ამის გათვალისწინებით თბილისის სატრანსპორტო კომპანიამ დაიწყო აღნიშნული ავტობუსების მართვისთვის საჭირო „ე“ კატეგორიის მოწმობის მისაღებად კომპანიაში ამჟამად მომუშავე მძღოლების გადამზადება, რაც ძალიან მნიშვნელოვანია. მათ ნაცვლად აუცილებელი გახდება შეივსოს 8, 10 და 12-მეტრიანი ავტობუსების მძღოლების ვაკანსიები. საუბარია დაახლოებით, 400 მძღოლის ვაკანსიაზე. შესაბამისად, მინდა მივმართო ყველა დაინტერესებულ პირს, ვისაც აქვს სურვილი მიიღოს მონაწილეობა ვაკანსიებში და დასაქმდეს. ინფორმაციისთვის გეტყვით, რომ მოცემულ ვაკანსიაზე თანამდებობრივი სარგო შეადგენს 2500-3000 ლარამდე გამომუშავებით“, - განაცხადა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
