თბილისის მერიის დაქვემდებარებაში არსებულმა თბილისის სატრანსპორტო კომპანიამ "თეგეტა თრაქ ენდ ბასთან" 18-მეტრიანი ავტობუსების ტექნიკური მომსახურების შესყიდვისთვის 20 მილიონი ევროს ღირებულების კონტრაქტი გააფორმა.

ცნობისთვის, თბილისის მერიამ აღნიშნული ავტობუსები ორ ტრანშად შეიძინა, თავდაპირველად შეისყიდა 160 ერთეული ავტობუსი, შემდეგ კი დამატებით 40 ერთეული. მთლიანობაში სახელმწიფომ ამ ავტობუსების შესყიდვისთვის 324 მილიონი ლარი გადაიხადა.

2024 წლის ივნისში თბილისის სატრანსპორტო კომპანიამ გააფორმა 25 მილიონი ევროს ხელშეკრულება ავტობუსების საგარანტიო და ტექნიკურ მომსახურებაზე. შესაბამისად, ამ ორივე კონტრაქტის ღირებულება, რაც 18-მეტრიან ავტობუსებს უკავშირდება, 45 მილიონ ევროს შეადგენს. ორივე კონტრაქტი 2027 წლის ზაფხულამდე არის მოქმედი.

ამასთან, "თეგეტა მოტორსი" არის BMC-ის 12-მეტრიანი CNG ავტობუსების ტექნიკური მომსახურების მიმწოდებელიც, რასთან დაკავშირებითაც გასული წლის დეკემბერში კომპანიასთან 12 მილიონი ევროს ღირებულების ხელშეკრულება გაფორმდა.

არსებული მდგომარეობით, ახალი 18-მეტრიანი ავტობუსების მნიშვნელოვანი ნაწილი თბილისს ჯერ არ ემსახურება, რადგანაც აღნიშნულისთვის აეროპორტის მიმდებარედ ავტობუსების ახალი დეპოს გახსნა არის აუცილებელი. თბილისის მერიაში მოელიან, რომ დეპოს სრულად აღჭურვა და დასრულება ორი თვის ვადაში დასრულდება.