,
თბილისის მერიის ურბანული სამსახური ელიავას ბაზრობის განაშენიანების რეგულირების გეგმის შექმნაზე მუშაობას იწყებს.
როგორც დედაქალაქის მთავრობის სხდომაზე ქალაქის მერმა, კახა კალაძემ განაცხადა, იმ ფორმით დარჩენა, რა ფორმითაც ელიავას ბაზრობა დღეს არსებობს, კატეგორიულად მიუღებელია.
„ჩვენ ძალიან ბევრი ვიმუშავეთ, თუ როგორ უნდა მოვიქცეთ და რა ნაბიჯები უნდა იქნას გადადგმული, რომ ეს არსებული პრობლემა მოგვარდეს. მე მგონი, არავის მოგვწონს ელიავას ბაზრობის ფუნქციონირება იმ ფორმით, რა ფორმითაც ხდება ეს. ეს წარმოადგენს სერიოზულ დისკომფორტს, პირველ რიგში, იქ მომუშავე ადამიანებისთვის და ასევე, წარმოადგენს დისკომფორტს ყველა იმ ადამიანისთვის, ვინც ყოველდღიურად მიდის სხვადასხვა რამის შესასყიდად. ჩვენ გვქონდა არაერთი შეხვედრა ელიავას ბაზრობის მეპატრონეებთან, საკმაოდ დიდი ჯგუფია და ჩვენ წარვუდგინეთ ჩვენი ხედვა, აქ ძალიან ბევრი იყო საუბარი სხვადასხვა მიმართულებებზე, თუ როგორ უნდა მომხდარიყო ელიავას ბაზრობის შემდგომი განვითარება, იყო საუბარი ასევე, ხომ არ გადაგვეტანა ქალაქის სხვა რომელიმე ადგილზე. ჩვენ მუშაობის შედეგად მივიღეთ გადაწყვეტილება, რომ პირველი, იმ ფორმით დარჩენა, როგორიც არის დღეს, კატეგორიულად მიუღებელია და მეორე, ჩვენ ვაძლევთ შესაძლებლობას, განაშენიანების რეგულირების ფარგლებში, რომელიც უნდა შემუშავდეს და დამტკიცდეს, ამ გეგმის ფარლებში მოხდეს არსებული მდგომარეობის გამოსწორება”, - განაცხადა კალაძემ.
მისივე თქმით, გარდა ამისა, იქ არსებული სავაჭრო ობიექტების ფუნქციონირება არანაირ სტანდარტს არ აკმაყოფილებს.
„ჩვენ გვაქვს სერიოზული პრობლემა და კიდევ ერთხელ გავიმეორებ, რომ ქალაქის განვითარების პარალელურად, სავაჭრო ობიექტის არსებობა, რომელიც არანაირ სტანდარტს არ აკმაყოფილებს, მისი ასეთი ფორმით შენარჩუნება პრინციპულად მიუღებელია. ეს არის აქტიური ეკონომიკური ზონა, რომელიც ხელსაყრელი, ხელმისაწვდომი და მნიშვნელოვანია როგორც მოვაჭრისთვის, ასევე მომხმარებლისთვის. იცით, რომ 1 წლის წინ დავამტკიცეთ გენგეგმა, სადაც არის აღნიშნული, რომ ამ ზონას აქვს შენარჩუნებული მისი სავაჭრო ზონის სტატუსი და შესაბამისად, ჩვენ გვინდა, რომ ამ გენგეგმის ფარგლებში მოხდეს არსებული სიტუაციის გაჯანსაღება და გამოსწორდეს იქ არსებული მდგომარეობა, რომელიც არის მძიმე, ეს აწუხებს იქ მცხოვრებ ადამიანებსაც. ის ქუჩები, სადაც საკმაოდ ბევრი ადამიანია დასახლებული, საკმაოდ სერიოზულ პრობლემას წარმოადგენს. განაშენიანების რეგულირების გეგმა, რომელიც უნდა გააკეთოს ჩვენმა ურბანულმა სამსაუხურმა, სადაც დეტალურად იქნება გაწერილი გზათა ქსელი, კომუნიკაციები, რეკრეაციურლი სივრცეები და სავაჭრო სივრცეების მოწყობის გეგმარება, ანუ ის სურათი, რაც გვაქვს დღეს, ეს არ იქნება და ვერ იქნება. შეუძლებელია ამ ფორმით გაგრძელება. სპეკულირება რომ არ იყოს, კიდევ ერთხელ ვიმეორებ, ჩვენ ხელს არავის ვუშლით და არავის ვუზღუდავთ საქმიანობას, თუმცა, ჩვენ გუშინაც გქონდა შეხვედრა და მფლობელეთან შევთანხმდით, რომ ამ ფორმით გაგრძელება ძალიან ცუდი იქნება. შესაბამისად, ვიწყებთ მუშაობას ამ განაშენიანების რეგულირების გეგმის შექმნაზე და დამტკიცების შემდეგ მოხდება ტერიტორიის გაჯანსაღება ეტაპობრივად”, - აღნიშნა კალაძემ.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
