,
თბილისის მერიამ გმირთა მოედანზე „ლაგუნა ვერეს“ მიმდებარე ტერიტორიის რეაბილიტაცია-რეკონსტრუქცია დაასრულა.
როგორც დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე აღნიშნა, გზის სავალი ნაწილის საფუძვლიანი რეაბილიტაციის გარდა, ინფრასტრუქტურის სრული მოდერნიზაცია განხორციელდა.
„თბილისის მერიამ გმირთა მოედანზე „ლაგუნა ვერეს“ მიმდებარე ტერიტორიის რეაბილიტაცია-რეკონსტრუქცია დაასრულა. აღნიშნული სატრანსპორტო კვანძი დედაქალაქის ერთ-ერთი ყველაზე მნიშვნელოვანი და დატვირთული მონაკვეთია, სადაც სხვადასხვა მიმართულების სატრანსპორტო ნაკადები იკვეთება და ნაწილდება. სამუშაოები გმირთა მოედნიდან ზვიად გამსახურდიას სახელობის სანაპირომდე არსებულ საგზაო მონაკვეთში განხორციელდა, სადაც გზის სავალი ნაწილის საფუძვლიანი რეაბილიტაციის გარდა, ინფრასტრუქტურის სრული მოდერნიზაცია განხორციელდა. პროექტის ფარგლებში, მიწისქვეშა კომუნიკაციების რეაბილიტაციის სამუშაოები ჩატარდა. კერძოდ, მოეწყო სანიაღვრე სისტემა, ამორტიზებული გაზმომარაგების მილები შეიცვალა და ელექტროგადამცემი სადენები მიწისქვეშა კაბელ-არხებში განთავსდა. საგზაო სამუშაოები 32 000 კვ.მეტრ ფართობზე ჩატარდა, სადაც ასფალტის საფარი დაიგო. ამასთან, მოეწყო გარე განათების ქსელი LED სანათებით. ტერიტორია ადაპტირდა შშმ პირებისთვის“, - აღნიშნა კახა კალაძემ.
მისივე ინფორმაციით, პროექტი წარიმართა წინასწარ შემუშავებული საგზაო მოძრაობის ოპტიმიზებული სქემის მიხედვით.
„ტერიტორიაზე მოეწყო შუქნიშნის ორი ობიექტი, რომელიც სინქრონულად იმუშავებს სანაპიროზე განთავსებულ, შუქნიშნით რეგულირებულ კვანძთან, რაც საგზაო მოძრაობის ორგანიზებას გააუმჯობესებს. გმირთა მოედანი აღიჭურვა უახლესი თაობის, ხელოვნური ინტელექტის სისტემაზე დაფუძნებული შუქნიშნებით, რომლებიც რეალურ დროში აკონტროლებენ სატრანსპორტო ნაკადებს და ავტომატურად არეგულირებენ შუქნიშნის ფაზებს, რაც მოძრაობას კიდევ უფრო ოპტიმალურს გახდის.
ზოოპარკის მიმდებარე ტერიტორიაზე, ასევე, მოეწყო საფეხმავლო გადასასვლელი, რომელიც, ფაზების ცვლილებისას, ავტომობილების მოძრაობის შეფერხების გარეშე, ქვეითებს უსაფრთხო გადაადგილების საშუალებას მისცემს. გარდა ამისა, გამოიყო დამატებითი საავტომობილო ზოლი, რაც ნაკადების დინამიკურ გადანაწილებას შეუწყობს ხელს, უსაფრთხოების მაქსიმალური უზრუნველყოფისთვის კი მოეწყო კუნძულები და სრულად განახლდა საგზაო ჰორიზონტალური მონიშვნები“, - განაცხადა დედაქალაქის მერმა.
მისივე თქმით, ტერიტორიაზე არსებული ნაკადებიდან გამომდინარე, ამ ეტაპზე, ცოცხალ რეჟიმში დაკვირვება მიმდინარეობს, რათა განისაზღვროს ახალი შუქნიშნების ოპტიმალური სამუშაო რეჟიმი.
„განხორციელებული ცვლილებები მნიშვნელოვნად გააუმჯობესებს დედაქალაქის საგზაო ინფრასტრუქტურას და გადაადგილების პროცესს უფრო კომფორტულსა და უსაფრთხოს გახდის. აღსანიშნავია ისიც, რომ სატრანსპორტო ნაკადებზე დაყრდნობით, ავტომატურ რეჟიმში, უწყვეტად მიმდინარეობს ახალი შუქნიშნების კალიბრაცია, რათა შეირჩეს მათი ოპტიმალური სამუშაო რეჟიმი და შემუშავდეს დროითი გეგმა. პროცესი რამდენიმე დღეში დასრულდება. პროექტის ფარგლებში, ჩატარდა გამწვანების სამუშაოებიც. დაირგო, დაახლოებით, 140 ძირი ხე-მცენარე. შედეგად, აღნიშნული ტერიტორია საკმაოდ ლამაზი და კეთილმოწყობილია“, - აღნიშნა კახა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
