დღეს გამართულ თბილისის მთავრობის სახდომაზე, დედაქალაქის მერი კახა კალაძე რამოდენიმე აქტუალურ საკითხს შეეხო.

კახა კალაძემ განაცხადა, რომ  დედაქალაქის მერია ყველაფერს გააკეთებს იმისთვის, რომ რაც შეიძლება ბევრი მწვანე სივრცე შეიქმნას თბილისში.

„მე არ შემიძლია არ ვისაუბრო რეკრეაციული სივრცეების არსებობის მნიშვნელობაზე და მგონი, ყველა ხედავს ჩვენს მიდგომსა და დამოკიდებულებას, თუ რამდენი პროექტი იქნა განხორციელებული. ეს არის გამგეობების მხრიდან სკვერების რეაბილიტაცია, არსებული პარკების განახლება-მოწესრიგება, ახალი პარკების მშენებლობის დაწყების პროექტების შექმნა იმისთვის, რომ შევძლოთ და მომავალში განვახორციელოთ საქალაქო დონის პარკების მშენებლობა. ეს პროცესი უნდა გაგრძელდეს და ყველაფერს გავაკეთებთ იმისთვის, რომ რაც შეიძლება ბევრი მწვანე სივრცე შეიქმნას დედაქალაქში, რომ ადამიანებს ჰქონდეთ საშუალება და შესაძლებლობა, დაისვენონ სასიამოვნო, მწვანე გარემოში შვილებითა და შვილიშვილებით“,- განაცხადა კალაძემ.

მისივე თქმით, სამშენებლო პროექტები სპორტული კომპლექსებისა და რეკრეაციული სივრცეების ხარჯზე არ განხორციელდება.

„ის დრო, როდესაც სპორტული მოედნების ხარჯზე, როდესაც რეკრეაციული სივრცეების ხარჯზე ხდებოდა მშენებლობების განხორციელება, სრული პასუხისმგებლობით გეუბნებით, რომ ჩვენი მთავრობის პირობებში ვერ და არ მოხდება. არ დავუშვებთ იმას, რომ რეკრეაციული სივრცეები და სპორტული მოედნები შეეწიროს კორპუსების მშენებლობას თუ სხვადასხვა ოფისების მშენებლობებს. ჩვენ ქალაქში გვაქვს საკმარისი სივრცე იმისთვის, რომ დეველოპერებს ჰქონდეთ შესაძლებლობა განვითარდნენ და განახორციელონ პროექტები, რომელიც დაგეგმილი აქვთ, მაგრამ ეს არ მოხდება სპორტული და რეკრეაციული სივრცეების ხარჯზე“,- განაცხადა კალაძემ.

სხდომაზე ასევე განხილული იქნა საკითხი, რომ გამგებლებმა, მერის მოადგილეებმა და სხვა ხელმძღვანელ პირებმა თანამშრომლები მაქსიმალურად დისტანციურ რეჟიმზე გადაიყვანონ.

როგორც კალაძემ დედაქალაქის მთავრობის სხდომაზე განაცხადა, არსებული ეპიდსიტუაციიდან გამომდინარე, სასურველია, რომ თანამშრომლებმა სახლიდან იმუშავონ.

„მინდა მივმართო მოადგილეებს, სამსახურის ხელმძღვანელებს და გამგებლებს, რომ თანამშრომლები მაქსიმალურად დატოვოთ სახლში, თუ ამით საქმე არ გიფუჭდებათ. ამუშავეთ დისტანციურად და ნუ მოთხოვთ სამსახურში მოსვლას არსებული ეპიდემიოლოგიური მდგომარეობიდან გამომდინარე. ჩემი თხოვნა იქნება, მაქსიმალურად შეზღუდეთ ადამიანების რაოდენობა და მიეცით შესაძლებლობა დისტანციურად, სახლიდან იმუშავონ, თუ ეს პრობლემას არ შეგიქმნით. ეს გადაწყვიტეთ ყველა სამსახურის ხელმძღვანელმა, ყველა გამგებელმა და მოადგილეებმა თქვენი შეხედულებისამებრ“, - განაცხადა კალაძემ.