წყარო:https://bm.ge/

ელს რთველი საკმაოდ რთულ პირობებში ჩატარდა. კახეთში მოსული სეტყვის შედეგად 6 ათას ჰექტარამდე ფართობი დაზიანდა, რის გამოც სახელმწიფოს დამატებითი ფინანსური სახსრების გამოყოფა დასჭირდა ფერმერების დასახმარებლად. წლევანდელი რთველი რთულია რაჭველი მევენახეებისთვისაც, რადგან როგორც ადგილობრივები ამბობენ, უხვნალექიანმა ზაფხულმა და სეტყვამ ყურძნის მოსავლის დიდი ნაწილი გაანადგურა. მთავრობის გადაწყვეტილებით, მიმდინარე წელს, რთველის მხარდასაჭერად, სუბსიდირების პროგრამა რაჭის რეგიონშიც განხორციელდება. სოფლის მეურნეობის მინისტრმა გუშინ მედიასთან განაცხადა, რომ მთავრობა სუბსიდიის სახით 4 ლარს გადაიხდის იმ პირობით, თუ კომპანიები ფერმერებისგან 1 კილოგრამ ყურძენს 7 ლარად შეიძენენ. აღსანიშნავია, რომ რთველის სუბსიდირების პროგრამა რაჭაში გასულ წელსაც მსგავსი პირობებით განხორციელდა. სამინისტროს ინფორმაციით, რაჭაში უკვე გადამუშავებულია 300 ტონამდე ყურძენი. 

თუ როგორ მიმდინარეობს რთველი რაჭაში, მისაღებია თუ არა მევენახეებისთვის ის ფასი, რაც ბაზარზეა და უწყობს თუ არა დარგის განვითარებას ხელს სახელმწიფოს მიერ ამ სექტორის სუბსიდირება, ამის შესახებ “სარდანაშვილის მეღვინეობის”  დამფუძნებელმა ალეკო სარდანაშვილმა გადაცემა “საქმიან დილაში” სტუმრობისას ისაუბრა.

“ბოლო ორი დღეა რაჭაში უამინდობაა და ასეთ პირობებში მიმდინარეობს ყურძნის ჩაბარება, რაც სტიქიის შემდეგ დარჩენილ ჩაბარებული ყურძნის ხარისხზე აუცილებლად აისახება. ამ ორი დღის მაგალითზე შემიძლია ვთქვა, რომ კარგი ღვინის დასამზადებლად ასეთ ამინდში ადამიანებს ყურძენი არ უნდა აკრეფინო. რაც შეეხება მოლოდინებს, 300 ტონა ყურძენი უკვე დაიკრიფა, სახელმწიფო 2000 ტონამდე ყურძენს ვარაუდობს, რაც წარმოუდგენელია, ვინაიდან ამ ორ დღეში ვენახების უმეტესობა დაკრეფილია. ჩემი ვარაუდით, მიმდინარე წელს 1000 ტონამდე ყურძენი მოვა”, - აღნიშნა ალეკო სარდანაშვილმა.

სუბსიდირებაზე საუბრისას, მეღვინეობის დამფუძნებელმა განმარტა, რომ სახელმწიფოს სუბსიდირებას ძალიან უარყოფითი გავლენა აქვს სექტორზე.

“სუბსიდირებას საკმაოდ უარყოფითი გავლენა აქვს სექტორზე, სუბსიდირებამ გამოიწვია ის, რომ საკმაოდ დიდ ფართობებზე შენდება ვენახები, მოიმატა მოსავალმა, თუმცა მოთხოვნა არ გაზრდილა,  რადგან სახელმწიფოს მეტი და მეტი თანხის გადახდა და სუბსიდირების განხორციელება უწევს. სუბსიდია საბოლოო ჯამში დარგისთვის დაკარგული ფულია, რადგან მეღვინეობის განვითარების მხრივ რაჭაში საკმაოდ ცუდი მდგომარეობაა და მეორე მხრივ საკმაოდ დიდ ფართობებზე შენდება ვენახები იმის იმედით, რომ სახელმწიფო ყოველთვის დაამატებს გარკვეულ თანხას და მევენახეები მოსავალს მისაღებ ფასად ჩააბარებენ, რაც აბსურდულია. წელსაც, მევენახეებისთვის შეთავაზებული ფასი მისაღები არ არის, რადგან რა თანხასაც ისინი ყურძნისთვის იღებენ, მინიმალური ფასია", - თქვა სარდანაშვილმა.

ამასთან, სარდანაშვილმა გადაცემაში სტუმრობისას განმარტა, რომ სახელმწიფოს მიერ სუბსიდირებისთვის გამოყოფილი თანხის დიდი ნაწილი უნდა მარკეტინგსა და რეგიონის სექტორის ცნობადობის ამაღლებაში უნდა ჩაიდოს.

“ყოველწლიურად 2 დღით გადაწყვეტილი ფესტივალების ჩატარება აბსოლუტურად არაფრის მომცემია, ეს არის მეღვინეებისა და მევენახეების დროის ფუჭი ხარჯვა, ამ დარგს უფრო სისტემური მიდგომა უნდა, იგივე განათლების მხრივ, რათა ადამიანებს ნაწვალები არ გაუფუჭდეთ იმის გამო, რომ არ იციან რა დროს რომელი პრეპარატით შეწამლონ ყურძენი. სახელმწიფოს მიერ გამოყოფილი თანხები სწორედ მარკეტინგსა და მევენახეების ცნობადობის ამაღლებაში უნდა იხარჯებოდეს”, - დასძინა მან