,
საქართველოს ტექნიკურ უნივერსიტეტსა და დანტე ალეგიერის საზოგადოება-თბილისის კომიტეტს შორის ურთიერთთანამშრომლობის მემორანდუმი გაფორმდა, რომელსაც ხელი სტუ-ის რექტორმა, პროფესორმა დავით გურგენიძემ და დანტე ალეგიერის საზოგადოება-თბილისის კომიტეტის პრეზიდენტმა ნინო ცერცვაძემ, მოაწერეს.
ღონისძიებას ესწრებოდნენ სტუ-ის ადმინისტრაციისა და ფაკულტეტების წარმომადგენლები, საქართველოში იტალიის სრულუფლებიანი ელჩი, მისი აღმატებულება ენრიკო ვალვო, საქართველოს პრეზიდენტის ადმინისტრაციის ხელმძღვანელი ნათია სულავა, დანტე ალეგიერის საზოგადოება-თბილისის კომიტეტის პრეზიდენტი ნინო ცერცვაძე და კომიტეტის წარმომადგენლები.
საქართველოს ტექნიკური უნივერსიტეტის რექტორის, პროფესორ დავით გურგენიძის განცხადებით, სტუ-სა და დანტე ალიგიერის საზოგადოება-თბილისის კომიტეტს შორის გაფორმებული მემორანდუმი, კიდევ ერთი დადასტურებაა ორ ქვეყანას და ასევე, სტუ-სა და იტალიის წამყვან უნივერსიტეტებს შორის ურთიერთთანამშრომლობისა და მეგობრობის გაღრმავების საქმეში.
„საქართველოს ტექნიკურ უნივერსიტეტს დიდი გამოცდილება აქვს მეგობარი ქვეყნების ენის, მეცნიერებისა და კულტურის პოპულარიზაციაში. ჩვენთან მოქმედებს ლიეტუვური ენის, მეცნიერებისა და კულტურის ცენტრი, სადაც ასობით სტუდენტი დაეუფლა ევროპის ერთ-ერთი წარმატებული ქვეყნის ენას, გაიცნო მათი კულტურა და მონაწილეობა მიიღო გაცვლით პროგრამებში. ურთიერთთანამშრომლობის მემორანდუმის საფუძველზე, ჩვენს მიერ ერთობლივად შემუშავდა საერთაშორისო პროექტი - ,,საქართველოს ტექნიკურ უნივერსიტეტში დიდაქტიკური ცენტრის (,,დანტეს კაბინეტის“) გახსნა და იტალიური ენის ეფექტური და ხარისხიანი სწავლების ინტერდისციპლინარული კურსების ორგანიზება". პროექტი დაფინანსებულია დანტე ალიგიერის საზოგადოების რომის სათაო ოფისის მიერ, მადლობა მათ მხარდაჭერისთვის“, - განაცხადა დავით გურგენიძემ.
საერთაშორისო პროექტის ფარგლებში დანტე ალიგიერის საზოგადოება - თბილისის კომიტეტმა, სტუ-სთან თანამშრომლობით ჩაატარა კონკურსი, რომლის შედეგად იტალიური ენის ინტერდისციპლინარული უფასო კურსებზე ჩასარიცხად, სტუ-ის სხვადასხვა ფაკულტეტის 108 კანდიდატიდან შეარჩია 53 მსმენელი, რომელთა შორის, უნივერსიტეტის სტუდენტებთან ერთად, აირჩა აგრეთვე 14 მსმენელი სტუ-ის პროფესორ-მასწავლებლებს, თანამშრომლებსა და დოქტორანტებს შორის.
„პროექტი ითვალისწინებს იტალიური ენის სასწავლო კურსების წარმართვას 2022-23 სასწავლო წლის 2 სემესტრის განმავლობაში და სწავლების დაწყების თარიღად შერჩეულ იქნა 17 ოქტომბერი, რომელიც ემთხვევა იტალიის მთავრობის ერთ-ერთ მნიშვნელოვან საერთაშორისო მასშტაბის ღონისძიებას, კერძოდ, „იტალიური ენის XXII მსოფლიო კვირეულს“. განხორციელების ფაზაშია, აგრეთვე, კიდევ ერთი მნიშვნელოვანი საერთაშორისო პროექტი, რომელიც გულისხმობს მხოლოდ საქართველოს ტექნიკურ უნივერსიტეტში პირველი ჰიბრიდული სასწავლო აუდიტორიის გახსნას. აუდიტორია თანამედროვე ტექნოლოგიებითა და საერთაშორისო სტანდარტებით იქნება აღჭურვილი ცნობილი ამერიკული კომპანიის Zoom.Us-ის და დანტე ალიგიერის საზოგადოების საერთაშორისო ქსელის თანამშრომლობის შედეგად. მოხარული ვართ, რომ ურთიერთთანამშრომლობის საწყის ეტაპზე, დანტე ალიგიერის საზოგადოება ორი ზემოაღნიშნული პროექტის ფარგლებში სტუს-ს მიერ გამოყოფილ სივრცეში განახორციელებს დაახლოებით 25 000-30 000 ევროს ოდენობის გრანტის ინვესტიციას“, - განაცხადა ნინო ცერცვაძემ.
საქართველოს ტექნიკურ უნივერსიტეტს და დანტე ალეგიერის საზოგადოება-თბილისის კომიტეტს მხარდაჭერა გამოუცხადა საქართველოში იტალიის სრულუფლებიანმა ელჩმა, მისმა აღმატებულება ენრიკო ვალვომ.
„ურიერთთანამშრომლობის მემორანდუმი ხელს შეუწყობს საერთაშორისო ურთიერთობების განვითარებას საქართველოს ტექნიკურ უნივერსიტეტსა და სხვა უნივერსირტებს შორის. ძალიან სასიამოვნოა, რომ დღევანდელი ღონისძიება არის ერთ-ერთი შემადგენელი ნაწილი მსოფლიოში იტალიური ენის კვირეულისადმი მიძღვნილი ღონისძიებებისა, რომელსაც ჩვენი სახელმწიფო აღნიშნავს და ასევე, სასიამოვნოა, ღონისძიება ემთხვევა საქართველოსა და იტალიას შორის დიპლომატიური ურთიერთობების აღდგენის 30 წლისთავს. ჩვენი ხალხების განსაკუთრებული ურთიერთობების დასტურია ისიც, რომ იტალიური შევიდა სკოლებში როგორც ერთ-ერთი უცხო ენა, რომელსაც წელს 6500 სტუდენტი ეუფლება. მადლობა რექტორს თანამშრომლობისთვის, იმედი მაქვს დანტე ალეგიერის საზოგადოების ეს ინიციატივა იქნება ჩვენი ურთიერთობების შემდგომი ხელშეწყობის გარანტი“, - განაცხადა ენრიკო ვალვომ.
