დღეს მსოფლიოში ყველაზე გამოყენებად და ყველაზე „პოპულარული“ ინტერნეტ საიტი Worldometers.info -ა, საიტი სადაც ონლაინ რეჟიმში შეგიძლიათ იხილოთ სტატისტიკური მონაცემები კორონავირუსის გავრცელების, დაინფიცირებულთა, გამოჯანმრთებულთა და გარდაცვლილთა რაოდენობის შესახებ.
საიტი შეიქმნა 2004 წლის 3 სექტემბერს და აქ თქვენ შეგიძლიათ იხილოთ მონაცემები დედამიწის მოსახლეობის, ეკონომიკის, ეკოლოგიის, ენერგიის მოხმარების და საზოგადოების მიერ მოხმარებული ან შეძენილი სხვადასხვა ნივთების შესახებ. მონაცემების განახლება ხდება რეალური დროის რეჟიმში.
მონაცემები კორონავირუსის შესახებ რეალურ რეჟიმში ნახლდება და ბევრ საინტერესო ინფორმაციას შეიცავს, რაც მეტ-ნაკლებად საშუალებას იძლევა, სტატისტიკური მონაცემების საფუძველზე, რაღაცა სახის პროგნოზები მაინც გაკეთდეს სამოყვარულო დონეზე.
ამ დღეებში მონაცემთა ბაზას ამა თუ იმ ქვეყანაში ტესტირებულთა რაოდენობის აღმრიცხველი გრაფაც დაემატა.
თუ თვალს მივადევნებთ, ვნახავთ, რომ ტესტირებულთა რაოდენობასა და ინფიცირებულთა, ან დაღუპულთა რაოდენობებს შორის რაიმე აშკარა კორელაცია არ არის. ასე მაგალითად - იტალია, რომელიც ინფიცირებულთა და დაღუპულთა რაოდენობით ევროპაში კვლავ პირველ ადგილზეა, ტესტირებულთა რაოდენობით 1 მლნ მოსახლეზე გადაანგარიშებით გერმანიას არ ჩამორჩება. ხოლო ტესტირების მასობრიობით ყველაზე დაწინაურებული ქვეყანა - შვეიცარია, 1 მლნ მოსახლეზე გადაანგარიშებით ინფიცირებულების რიცხვით ესპანეთის შემდეგ ევროპაში მეორე ადგილზეა!
ცხადია, სწრაფი ტესტი - პანაცეა ნამდვილად არ არის და თუ ეპიდსიტუაცია თავიდანვე კონტროლიდან გავიდა, მის გამოყენებასაც, განსაკუთრებით მაშინ თუ ჯანდაცვის სისტემა გადაიტვირთება, უკვე დიდი აზრი აღარც აქვს...
სამხრეთ კორეა, რომელიც სწრაფი ტესტების ეფექტურობისა და მასობრივი გამოყენების მაგალითად სახელდებოდა, 1 მლნ მოსახლეზე ტესტირებულთა რაოდენობით (8 875) თითქმის ორჯერ ჩამორჩება შვეიცარიას (16 844), ასევე გერმანიას, იტალიას, ავსტრიას, სლოვენიას და თვით ესტონეთსაც (14 392) კი.
პანდემიის შეკავებაში, როგორც ჩანს, გარკვეულ ეტაპზე, ხდება მნიშვნელოვანი სწრაფი ტესტების მასობრივი გამოყენება, მაგრამ მანამდე და მას შემდეგ - არავითარი ეფექტი არა აქვს.
4 აპრილის 11:35 საათის მონაცემებით, მსოფლიოში კორონავირუსი 1,133,452 ადამიანს აქვს დადასტურებული. გარდაცვლილია 60,378 პაციენტი, გამოჯანმრთელებულია 235,999,
837,075 ადამიანი კი ამ წუთებშიც აგრძელებს მკურნალობას, მათგან 39,600 კრიტიკულ მდგომარეობაშია.