საქართველოს კულტურისა და სპორტის სამინისტროს მხარდაჭერით ქალაქ გორში თავისუფალი სტილით მოჭიდავეები და მოკრივეები პარიზის ზაფხულის ოლიმპიური თამაშებისთვის ბოლო მოსამზადებელ შეკრებაზე იმყოფებიან.
თავისუფალი სტილით ჭიდაობაში საქართველოს ღირსებას გოდერძი ძებისაშვილი (65 კგ), ვლადიმერ გამყრელიძე (86 კგ), გივი მაჭარაშვილი (97 კგ) და გენო პეტრიაშვილი (125 კგ) დაიცავენ. მოჭიდავეები შეკრებას საქართველოს ნაკრების წევრებთან და იტალიელ, პოლონელ, მოლდოველ და სომეხ სპორტსმენებთან ერთად გადიან. გორში ოლიმპიადის წინა მოსამზადებელ ვარჯიშებზე იმყოფებიან ცნობილი მოჭიდავეები ფრენკ ჩამიზო და გრეის ბულენი.
კრივში პარიზის ოლიმპიადაზე ლაშა გურული და გიორგი ყუშიტაშვილი იასპარეზებენ. სპორტსმენები ოლიმპიადისთვის ინტენსიურ მზადებას საქართველოს მოკრივეთა ნაკრების წევრებთან ერთად გადიან.
მოჭიდავეებისა და მოკრივეების ოლიმპიადისთვის მზადების პროცესს საქართველოს კულტურისა და სპორტის სამინისტროს სპორტის დეპარტამენტის უფროსის მოადგილე გიორგი არაბული და დეპარტამენტის წარმომადგენელი ალექსანდრე კოპალიანი ესწრებოდნენ. შეკრებების მთავარი მიზანი პარიზის ოლიმპიადისთვის სპორტსმენების ტაქტიკურ-ტექნიკური მომზადებაა.
