,
სომხეთის საგარეო საქმეთა სამინისტრომ რუსეთის ელჩს ნოტა გადასცა რუსულ სახელმწიფო მედიაში და ოფიციალურ პირებს შორის სომხეთის ხელისუფლების მიმართ გაკეთებული განცხადებების თაობაზე.
სომხეთის საგარეო საქმეთა სამინისტროს პრესმდივანმა, ანი ბადალიანმა აღნიშნა, რომ განცხადებაში გამოთქმულია მტკიცე პროტესტი რუსულ მედიაში სომხეთის მთავრობის წინააღმდეგ ღიად არამეგობრული, ხშირად მტრული პროპაგანდის მიმართ, რომელსაც აქტიურად ამყარებს ზოგიერთი თანამდებობის პირის, რუსეთის სახელმწიფო დუმის დეპუტატების, მედიისა და ექსპერტთა საზოგადოების წარმომადგენლების განცხადებები.
ნოტაში ხაზგასმულია, რომ რუსეთის სახელმწიფო ტელეარხების პირდაპირ ეთერში გაჟღერებული შეურაცხმყოფელი გამონათქვამები და სომხეთის ხელისუფლების საქმიანობაზე თავდასხმები სრულიად მიუღებელია და იწვევს სომხეთსა და რუსეთს შორის უმაღლეს დონეზე განხორციელებული ბოლო ვიზიტების პოზიტიური შედეგების განეიტრალებას.
„ამგვარად, მსგავსი განცხადებები არათუ აბსურდულია, რადგან გაუგებარია, როგორ და რატომ ითვლება სახელმწიფო გადატრიალების თავიდან აცილება არამეგობრულ ნაბიჯად, არამედ წარმოადგენს სომხეთის საშინაო საქმეებში უხეშ ჩარევას. მეტიც, ისეთი შთაბეჭდილება იქმნება, რომ მსგავსი საინფორმაციო პოლიტიკა მიზანმიმართულად ტარდება სომხეთში დემოკრატიის, კანონიერებისა და კონსტიტუციური წყობის შელახვის მიზნით“, - აღნიშნეს სომხეთის საგარეო უწყებაში.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
