შეტევა კურსკისა და ბელგოროდის ოლქებზე და მდგომარეობა უკრაინაში [შეჯამება

შეტევა კურსკისა და ბელგოროდის ოლქებზე და მდგომარეობა უკრაინაში [შეჯამება | 20.08.2024] - გიორგი კობერიძე

Date: 1038

- პუტინმა კურსკის ოლქში დაკარგული ტერიტორიების ბრძანება გასცა და ვადად პირველი ოქტომბერი განსაზღვრა. მაგრამ მიუხედავად ჰაერში გასროლილი ბრძანებისა ჯერჯერობით კვლავ უკრაინელები მიიწევენ წინ. მათ დღეს კიდევ უფრო გააფართოვეს კონტროლის ზონა და 1300 კვადრატულ კილომეტრამდე ტერიტორიას ფლობენ.

- კურსკის ოლქში, რაიონული ცენტრი კორენევოში რუსებისათვის უმძიმეს სიტუაციაზე საუბრობენ თავად რუსი პროპაგანდისტები. მიუხედავად იმისა, რომ მის შენარჩუნებას ძალიან დიდ ფასად ცდილობენ, უკრაინელები უკეთ მანევრირებენ და სამი მხრიდან ალყაშიც ჰყავთ დასახლება. სერიოზული მომზადებისა და ფორტიფიკაციების გარეშე რუსები ბევრად ცუდ შედეგს აჩვენებენ დაცვაში, ვიდრე უკრაინელები შეტევაში. არადა ცნობილია, რომ მეტ-ნაკლებად თანაბარ პირობებში შემტევი მხარე, როგორც წესი, უფრო მეტს კარგავს ხოლმე, ვიდრე დაცვაში მყოფი.

- სუჯას აღმოსავლეთით უკრაინელებსა და რუსებს შორის მარტინოვკას გასასვლელში მიმდინარეობს აქტიური საბრძოლო მოქმედებები. დასახლება უკრაინელთა ხელშია, მაგრამ რუსები მის შემოგარენს არ ტოვებენ. თავად რუსი სამხედრო პროპაგანდისტებიც კი ამ მიმართულებაზე არიან გადასროლილი. მიუხედავად მცდელობისა რუსებმა მარტინოვკას დაბრუნება ვერ შეძლეს.

- უკრაინელები ძალიან აქტიურად მიიწევენ წინ მდინარე სეიმის მიმართულებით, გლუშკოვოს რაიონში. რუსები აქ ოპერატიულ ალყაში არიან და მხოლოდ სამხედრო ხიდებით - პონტონებით - მარაგდებიან, ისიც ლიმიტირებულად. უკრაინული დანაყოფები კულბაკისათვის ბრძოლაში არიან ჩართულები, ხოლო უშუალოდ გლუშკოვოდან დაახლოებით 10 კილომეტრში არიან. მნიშვნელოვანია უკრაინელებმა მდინარე სეიმის მთელი მონაკვეთი ჩაიგდონ ხელთ, რათა შემდგომ მათი ფლანგი დაცული იყოს და მდინარემაც ბუნებრივი ბარიერის როლი შეასრულონ.

- მდინარე სეიმის დასავლეთით რუსების იურიდიულ ფლობაში არსებული 15 კვადრატული კილომეტრის სივრცის ტერიტორია უკრაინელებმა დაიკავეს და ტეტკინოში (ტიოტკინოში) გამაგრებულ რუსებს ძალიან ახლო მანძილიდან უხსნის ცეცხლს.

- პუტინმა ხელი მოაწერა კანონს, რომლის თანახმადაც უცხო ქვეყნის მოქალაქეები, რომლებიც იზიარებენ რუსულ ფასეულობებს ადვილად შეეძლებათ რუსეთში გადასახლება. ჰოდა... ვისაც უნდა კრემლის ფასეულობებში ცხოვრება მგონი წასვლისთვის ამაზე უკეთესი შანსი არ ექნება.

- უკრაინის უმაღლესმა რადამ (პარლამენტმა) მიიღო კანონი, რომლის თანახმადაც ყველა ის ორგანიზაცია თუ ინსტიტუცია, რომელიც მოსკოვის საპატრიარქოსთან თანამშრომლობს, უკანონოდ გამოცხადდა. იმ ფონზე, რომ რუსეთში ცეზაროპაპისტული ტრადიცია არსებობს და ეკლესია ღიად დამორჩილებულია კრემლის მიერ, მსგავსი გადაწყვეტილება ბევრად ადრე უნდა მიეღოთ კიდეც. მოსკოვის პატრიარქი დღემდე კრემლისა და უშიშროების უშუალო ჩარევით ინიშნება და მათ წინაშეა ხოლმე პასუხისმგებელი. მშვიდობიანი ხალხის კვლაზე კი კურთხევა დიდი ხანია გაცემული აქვთ მოსკოვში - ბირთვული იარაღის დალოცვასაც არ ერიდებიან, ხოლო რუსეთის მთავარ სამხედრო კათედრალში (მოსკოვის ოლქში) პროექტის მიხედვით პუტინის ფრესკასაც უნდა შევხვედროდით, შოიგუს, გერასიმოვთან და წითელი ტერორის მომწყობ სტალინთან ერთად, რომელმაც მოსკოვში მაცხოვრის ტაძარიც კი ააფეთქა. პროექტი მოგვიანებით შეიცვალა, მაგრამ ფრესკის იდეა კვლავ არსებობს (როგორი უნდა ყოფილიყო ის კომენტარებში დავურთავ).

ცეზაროპაპიზმით ჯერ კიდევ მოსკოვის დიდი მთავრები იწონებდნენ ხოლმე თავს. ვასილი მესამე და მისი ბიზანტიელი სოფია ამ ტრადიციის რუსეთში სრულყოფილად გამავრცელებლად მოიაზრებენ ხოლმე (მე-15 საუკუნე), თუმცა უფრო ადრინდელი ტრადიციებიც გვხდებოდა ამ საკითხთან მიმართებით.

- რუსები კვლავ წერენ, რომ შესაძლოა რილსკის მიმართულებაზე უკრაინელებმა საზღვარი არსებული საბრძოლო მოქმედებებიდან ჩრდილოეთითაც გადალახონ და შეუტიონ რაიონულ ცენტრს. სწორედ ამიტომ ვერ ხსნიან რუსები თავიანთ დანაყოფებს საზღვრის ამ წერტილიდან (რუკაზე მონიშნულია საიდან ფიქრობენ რუსები უკრაინელთა შესაძლო შეტევას).

რამდენიმე მეგობარმა მთხოვა შემედარებინა უკრაინელთა მიერ დაკავებული ტერიტორიების მასშტაბი საქართველოს რუკაზე, ჰოდა გთავაზობთ მას.