აპიტოლიუმში დონალდ ტრამპის მომხრეების შეჭრისა და შემდგომი მოვლენების შედეგად 4 ადამიანია დაღუპული. ინფორმაციას ვაშინგტონის პოლიცია ადასტურებს.
უწყების თანახმად, დაღუპულებს შორისაა ქალი, რომელიც კაპიტოლიუმის შენობაში ცეცხლსასროლი იარაღით, მკერდის არეში დაჭრეს. პოლიციის ცნობით, გარდაცვლილებს შორის არიან კიდევ ერთი ქალი და ორი კაცი, თუმცა კონკრეტულ მიზეზებზე, ამ დროისთვის, საუბარი არ არის.
CNN-ის ინფორმაციით, შეჭრისა და შეტაკებებისას დაშავებულთა შორის არაერთი პოლიციელია, რომელთაგან მინიმუმ ერთი – საავადმყოფოშია გადაყვანილი. ტელეკომპანია მომიტინგეებისგან შენობის გაწმენდის პროცესში კვამლის ყუმბარების გამოყენების შესახებაც იტყობინება. კაპიტოლიუმის ფანჯრების ნაწილი ჩმასხვრეულია.
6 იანვარს, ადგილობრივი დროით, აშშ-ის დედაქალაქ ვაშინგტონში მომიტინგეები კაპიტოლიუმის — აშშ-ის კონგრესის [პარლამენტის] შენობაში შეიჭრნენ. ამ დღეს უნდა საპრეზიდენტო არჩევნებში ჯო ბაიდენის გამარჯვება ოფიციალურად უნდა გაფორმებულიყო.
ვითარების გამწვავებიდან მალევე, სენატორების, წარმომადგენელთა პალატის წევრების და მათი ადმინისტრაციების თანამშრომლების ევაკუაცია დაიწყეს.
შეჭრას წინ უძღოდა ტრამპის მომხრეების საპროტესტო აქცია ვაშინგტონში. მათ სიტყვით თავად მოქმედმა პრეზიდენტმაც მიმართა. შენობაში ასობით პირის შეჭრის შემდეგ, ტრამპმა მხარდამჭერებს დაშლისკენ მოუწოდა, თუმცა “პატრიოტებად” მოიხსენია ისინი.
აშშ-ის წარმომადგენელთა პალატის სპიკერის, ნენსი პელოსის განცხადებით, კონგრესის ორივე პალატა დღესვე განაგრძობს საარჩევნო კოლეგიის ხმების დათვლას. კერძოდ, ეს მას შემდეგ მოხდება, რაც შესაბამისი სამსახურები კაპიტოლიუმს გაწმენდენ.