,
სერგეი ლავროვის განცხადებით, აშშ-ის სახელმწიფო მდივან ენტონი ბლინკენთან გამართულ დღევანდელ შეხვედრაზე რუსულმა მხარემ გაიმეორა მოთხოვნა ნატო-ს გაფართოების შეჩერებასთან დაკავშირებით.
„რაც შეეხება ჩვენს პრინციპულ მიდგომას ნატო-ს აღმოსავლეთით გაფართოების შეჩერების აუცილებლობის შესახებ, ჩვენ, რა თქმა უნდა, ეს გავიმეორეთ“, - განაცხადა ლავროვმა ბლინკენთან მოლაპარაკების შემდეგ.
მისი თქმით, ნატო მუშაობს რუსეთის ფედერაციის წინააღმდეგ, ამიტომ მოსკოვი ეწინააღმდეგება ბლოკის აღმოსავლეთით გაფართოებას.
„ეს ბლოკი შეიქმნა სსრკ-ს წინააღმდეგ, ახლა კი მუშაობს რუსეთის ფედერაციის წინააღმდეგ“, - განაცხადა ლავროვმა.
ლავროვის თქმით, ამით აიხსნება მოსკოვის პოზიცია, რომ აღმოსავლეთისკენ ნატო-ს გაფართოება არ უნდა მოხდეს.
რუსეთის საგარეო უწყების ხელმძღვანელის მტკიცებით, ენტონი ბლინკენმა შეხვედრაზე განაცხადა, რომ შეერთებული შტატები მომავალ კვირაში წარადგენს წერილობით პასუხებს „უსაფრთხოების გარანტიების“ შესახებ რუსეთის წინადადებებზე.
