,
BM.GE-ი დაინტერესდა, რა დატვირთვით მუშაობს დღეს სასტუმრო პარაგრაფი და ვინ სტუმრობს სასტუმროს ყველაზე ხშირად - უცხოელები თუ ადგილობრივი დამსვენებლები და ამ კითხვებით „პარაგრაფის“ გენერალურ მენეჯერს ელენე შარიქაძეს მიმართა.
სასტუმროს მენეჯერის ინფორმაციით, დღეს „პარაგრაფი“ თითქმის სრული დატვირთვით მუშაობს და სასტუმროს მენეჯმენტს არსებული ჯავშნების მიხედვით აგვისტოსა და სექტემბერში ანალოგიური დატვირთვის მოლოდინები აქვთ.
„ივნისი ძალიან წარმატებული იყო, შესაბამისად შემიძლია გითხრათ, რომ სასტუმროს ოპერირების 4-წლიანი პერიოდის განმავლობაში გასული თვე ერთ-ერთი საუკეთესო იყო. ივლისში სასტუმროს დატვირთულობა ასევე საკმაოდ მაღალია. აგვისტოს პროგნოზებიც, ჩვენი შეფასებით, ძალიან ოპტიმისტურია. თავისთავად ცხადია, არსებული ჯავშნები დაკავშირებულია ქვეყანაში ეპიდსიტუაციაზე; ასევე იმაზეც, ზოგადად ქვეყანა და მოსახლეობა რეგულაციების შენარჩუნებას რამდენად შეძლებს“, - აღნიშნა სასტუმრო „პარაგრაფის“ გენერალურმა მენეჯერმა.
სასტუმროს მენეჯმენტში განთავსების ღირებულებაზე არ საუბრობენ და აცხადებენ, რომ სასტუმროს ფასები დამოკიდებულია ოთახის კატეგორიაზე და სასტუმროს დატვირთულობაზეა დამოკიდებული. რაც შეეხება ვიზიტორებს ქვეყნების მიხედვით, სასტუმროში ამბობენ: „დამსვენებლების 70% ადგილობრივები არიან, 30%-ს კი უცხოელი ვიზიტორები. უცხო ქვეყნის მოქალაქეები ძირითადად უზბეკეთიდან, ყაზახეთიდან, უკრაინიდან, რუსეთიდან, ისრაელიდან და გალფის ქვეყნებიდან გვსტუმრობენ“.
ავტორი:თათია კაკიაშვილი ვიქტორია მღებრიშვილი
წყარო: bm.ge
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
