,
იყიდი თუ არა ფულით ბედნიერებას? - ბოლო დროის ერთ-ერთ ყველაზე გავრცელებულ კითხვას რამდენიმე ორგანიზაციის კვლევამ უკვე უპოვა პასუხი. აღნიშნულის თანახმადაც ფულით არა მხოლოდ ბედნიერების ყიდვაა შესაძლებელი, არამედ, მსოფლიოს სხვადასხვა წერტილში მცხოვრებ სხვადასხვა ასაკის ადამიანებს ამ თანხის ოდენობაზე განსხვავებული შეხედულება აქვს. Empower-ის მიერ აშშ-ში ჩატარებული კვლევის შედეგებს Euronews-ი აქვეყნებს.
კვლევის თანახმად, ამერიკის შეერთებულ შტატებში 10-დან 6 ადამიანს სჯერა, რომ ფულით ბედნიერების ყიდვა შესაძლებელია. აქედან, მილენიალების (1981-1996 წლებში დაბადებული თაობა) დიდი ნაწილი ბედნიერებისთვის საჭირო ოპტიმალურ ანაზღაურებად წელიწადში $525 000-ს ასახელებს. ამავე კვლევის თანახმად, Gen Z ბედნიერებას წლიურად $128 000-დ შეიძენს, Gen X $130 000-დ, ხოლო ბუმერების თაობისთვის $124 000-იც საკმარისია. შესაბამისად, საშუალო სტატისტიკური ამერიკელისთვის ბედნიერება წელიწადში $284 167 ღირს.
აღმოჩნდა, რომ ევროპელებს ბედნიერებისთვის გაცილებით ნაკლები სჭირდებათ. Purdue University-ის ბოლო კვლევის თანახმად, დასავლეთ ევროპისა და სკანდინავიის ქვეყნებში მოსახლეობა ცხოვრებით კმაყოფილია წლიური შემოსავლით, $100 000-ის ოდენობით. ამ თანხაზე მაღალი ხელფასის შემთხვევაში კი ევროპელების ცხოვრება გაცილებით უმჯობესდება.
აღმოსავლეთ ევროპაში კი ბედნიერება გაცილებით იაფად - წელიწადში $45 000 - ფასობს. თუმცა იგივე კვლევა ადასტურებს, რომ ემოციური კეთილდღეობა 35 000-დან 50 000 ევრომდე წლიურ შემოსავალს მოაქვს.
აღსანიშნავია, რომ ევროპის კვლევა ბევრი ქვეყნისათვის მაღალ დონიანი ინფლაციის პირობებში ჩატარდა. Euronews-მა კი იმ დროის მონაცემები დღევანდელობას მოარგო და აღმოაჩინა, რომ დასავლეთ ევროპელებს ბედნიერებისა და ემოციური კეთილდღეობისთვის წელიწადში 58 205 ევრო სჭირდებათ, აღმოსავლეთ ევროპელებს კი 40 690 ევრო.
და რას ნიშნავს ფინანსური ბედნიერება?
ამერიკული კვლევის თანახმად, გამოკითხულთა 67% ბედნიერებას კომუნალური გადასახადების დროულად გადახდასთან აიგივებს, 54% ყოველდღიური ფუფუნების ნივთებისა და სერვისების უპრობლემოდ კითხვასთან, 45% კი - უძრავი ქონების ფლობასთან.
გამოკითხულთა 50%-სთვის საყვარელ ადამიანებთან სხვადასხვა გამოცდილების დაგროვებაა მნიშვნელოვანი, 37%-სთვის კი ბედნიერება პენსიაზე უპრობლემოდ გასვლასთან ასოცირდება.
ამერიკელთა 73% ფინანსურ სტრესს განიცდის, ევროპელთა 85% კი ან მწვავე ფინანსურ სიტუაციაში არიან, ან საკუთარი ფინანსების ფრთხილად განკარგვა სჭირდებათ.
სად ჯდება ბედნიერება ყველაზე ძვირი?
Purdue University-ის კვლევის თანახმად, ყველაზე მაღალი სასურველი ხელფასი გლობალურად ირანშია - აქაურებს ბედნიერებისათვის წლიურად 220 ათასი ევროს შემოსავალი სჭირდებათ ამისათვის. ევროპაში კი ბედნიერება ყველაზე ძვირად ნორვეგიასა და შვედეთში, შესაბამისად, 107 ათას და 106 ათას ევროდ ფასობს. ლონდონში ეს თანხა 94,5 ათასი ევროა.
