დღეს გამთენიისას, თბილისის საერთაშორისო აეროპორტში პეკინიდან სპეციალური ავიარეისი შესრულდა. ჯანდაცვის სამინისტროს ინიციატივით, საქართველოში 52 ტონა ტვირთი ჩამოვიდა.

მათ შორის 40.000 პი-სი-არ ტესტი და ამდენივე ექსტრაქციის ნაკრები, დიდი რაოდენობით ინდივიდუალური ხელთათმანები, ხალათები და სხვა სამედიცინო ნივთები. იმავე რეისით ჩამოიტანეს, დამატებით ანტისხეულების 20 000 ტესტი, რომელიც საქართველოს ჩინეთის მთავრობამ უსასყიდლოდ გადასცა. ჩარტერული რეისი ავიაკომპანია ჯეოქსაიმ განახორციელა.

საქართველოში კორონავირუსისგან უკვე 168 ადამიანი გამოჯანმრთელდა. ინფორმაცია ვებგვერდზე stopcov.ge გამოქვეყნდა.

კარანტინის რეჟიმში - 5085 ადამიანი, სტაციონარში მეთვალყურეობის ქვეშ - 558. ამ დრომდე საქართველოში ვირუსის 511 შემთხვევაა დაფიქსირებული, 6 პაციენტი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.