საქართველოს კულტურისა და სპორტის მინისტრის მოვალეობის შემსრულებლის, თეა წულუკიანისა და საქართველოში ამერიკის შეერთებული შტატების საგანგებო და სრულუფლებიანი ელჩის, რობინ დანიგანის, გაცნობითი შეხვედრა სამინისტროში გაიმართა.
შეხვედრაზე ისაუბრეს საქართველოსა და ამერიკის შეერთებული შტატების მრავალწლიანი მეგობრობის, სტრატეგიული პარტნიორობისა და წარმატებული თანამშრომლობის შესახებ.
განსაკუთრებული ყურადღება დაეთმო კულტურისა და სპორტის სფეროებში უკვე არსებული თანამშრომლობის განვითარების შესაძლებლობებს.
საუბარი ასევე შეეხო კულტურული მემკვიდრეობის დაცვის საკითხებს, კულტურული მემკვიდრეობის ძეგლებისა და ტერიტორიების, მუზეუმ-ნაკრძალების დაცვისა და მუზეუმების მენეჯმენტის განვითარებისთვის მრავალწლიანი პარტნიორობის ფარგლებში განხორციელებულ პროექტებსა და პროგრამებს და მათი გაფართოების შესაძლებლობებს.
თეა წულუკიანმა ელჩს გულითადი მადლობა გადაუხადა ამერიკელი ხალხის მხარდაჭერისა და ისეთი წარმატებული ერთობლივი პროექტებისათვის, როგორიცაა, მაგალითად, დადიანების დედოფლისეული სასახლის საფონდო სივრცეების, სასახლეში დაცული ნივთებისა და არტეფაქტების კონსერვაცია-რესტავრაციის ფინანსური მხარდაჭერის პროექტი.
გარდა ამისა, შეხვედრისას ყურადღება დაეთმო კინემატოგრაფიის ეროვნული ცენტრის მიერ ქართული კინემატოგრაფიის სათანადოდ წარმოჩენას როგორც ამერიკის შეერთებულ შტატებში, ასევე, ევროპულ სტრუქტურებში, მათ შორის, „ევრიმაჟის“ წინაშე.
შეხვედრის ბოლოს, თეა წულუკიანმა რობინ დანიგანს წარმატებული და ნაყოფიერი დიპლომატიური საქმიანობა უსურვა და ქვეყნებს შორის, როგორც სტრატეგიული პარტნიორობის, ისე კულტურისა და სპორტის სფეროში ურთიერთობისა და მრავალწლიანი მეგობრობის კიდევ მეტად განმტკიცებისთვის მზადყოფნა გამოხატა. კულტურის მინისტრმა ასევე აღნიშნა, რომ საქართველო გააგრძელებს წარმატებულ სვლას ევროატლანტიკური ინტეგრაციის გზაზე.
რობინ დანიგანმა ამერიკის შეერთებული შტატების სახელით თეა წულუკიანს ნაყოფიერი თანამშრომლობის სურვილი დაუდასტურა და საქართველოს ევროკავშირის წევრობის კანდიდატის სტატუსის მიღება მიულოცა.
ინფორმაციისთვის: თეა წულუკიანისა და რობინ დანიგანის გაცნობითი შეხვედრა 2024 წლის 29 იანვარს გაიმართა.
