საქართველოს ყველა დროის ერთ-ერთი ყველაზე დიდი მთამსვლელი რაინჰოლდ მესნერი ეწვია

дата:

სპორტის სამინისტროს მხარდაჭერით საქართველოს ყველა დროის ერთ-ერთი ყველაზე დიდი მთამსვლელი რაინჰოლდ მესნერი ეწვია

საქართველოს კულტურისა და სპორტის სამინისტროს მხარდაჭერითა და მესტიის მოკლემეტრაჟიანი და მთის ფილმების საერთაშორისო ფესტივალის ერთ-ერთი დამფუძნებლის ხათუნა ხუნდაძის მოწვევით, ფესტივალს მთავარი საპატიო სტუმრის სტატუსით ეწვია თანამედროვე მთამსვლელობის ერთ-ერთი ფუძემდებელი და ცოცხალი ლეგენდა რაინჰოლდ მესნერი.

ცნობილ მთამსვლელს საქართველოს კულტურისა და სპორტის მინისტრის პირველმა მოადგილემ, იოსებ ბაღათურიამ, უმასპინძლა. მათ მესტიის საერთაშორისო ფესტივალისა და საქართველოში მთამსვლელობის ხელშეწყობის შესახებ ისაუბრეს.

რაინჰოლდ მესნერი მთის თემატიკაზე შექმნილი ფილმების რეჟისორი და პროდიუსერიც არის. 2022 წელს მესტიის მოკლემეტრაჟიანი და მთის ფილმების საერთაშორისო ფესტივალი გაიხსნა სწორედ მისი ფილმით - „არავის მიწა“, წელს კი მე-4 ფესტივალი გაიხსნება მესნერების ოჯახის საიდუმლოებით მოცული ტრაგედიის შესახებ „არტეს“ მიერ გადაღებული ფილმით „ნანგა პარბატი - ჩემი ცხოვრების მნიშვნელოვანი მთა“. 25 ივლისს ფესტივალზე გაიმართება რაინჰოლდ მესნერის მასტერკლასიც.

სამხრეთ ტიროლში დაბადებულმა იტალიელმა რაინჰოლდ მესნერმა ჯერ ალპებში, შემდეგ კი მსოფლიოს ურთულეს მწვერვალებზე მარტო და ჟანგბადის გარეშე ასვლის ტრადიცია დაამკვიდრა. ის პირველი ადამიანია, რომელიც მსოფლიოს უმაღლეს მწვერვალზე, ევერესტზე, მარტო ავიდა. ასევე პირველმა მეწყვილე პიტერ ჰაბელერთან ერთად მწვერვალი ჟანგბადის გარეშე დაიპყრო. ის არის პირველი ადამიანი, რომელმაც მსოფლიოს 14-ვე 8000-იანი მწვერვალი დალაშქრა, თანაც მათი ნაწილი სრულიად მარტომ და ჟანგბადის გარეშე. მის სახელს უკავშირდება მსოფლიოს ყველა კონტინენტის უმაღლესი მწვერვალის დაპყრობა. 30 წლის მანძილზე მან 3 500-ჯერ დალაშქრა სხვადასხვა მწვერვალი.

მოგვიანებით რეინჰოლდ მესნერმა გადაწყვიტა, უდაბნოები გადაელახა. მან ფეხით გაიარა ანტარქტიკა, გრენლანდია, ტაკლა-მაკანი და გობის უდაბნო; მიაღწია ჩრდილოეთ და სამხრეთ პოლუსებს.

მესტიის მოკლემეტრაჟიანი და მთის ფილმების საერთაშორისო ფესტივალი მესტიის კულტურისა და ხელოვნების ცენტრმა და რეჟისორმა და პროდიუსერმა ხათუნა ხუნდაძე დააფუძნეს. ფესტივალი წელს მეოთხედ ტარდება და ის სტუმრებს 23 ივლისიდან 27 ივლისის ჩათვლით უმასპინძლებს.

общество

ქონების გადასახადის დეკლარაციის წარდგენის ბოლო ვადაა 1 ნოემბერი. რა უნდა ვიცოდეთ და რა უნდა გავითვალისწინოთ?

თუ თქვენი და თქვენი ოჯახის წლიური შემოსავალი ჯამურად 40 000 ლარს აღემატება და ამასთანავე, გაქვთ სახლი ან მიწა ან ავტომობილი, თქვენ ვალდებული ხართ ბიუჯეტში ქონების გადასახადი გადაიხადოთ.

დაინტერესებული ფიზიკური პირებს, რომელთაც ქონების გადასახადის დეკლარაციის წარდგენა უწევთ, შემდეგი პროცედურები უნდა იცოდნენ:

"1. დეკლარაციის წარდგენის ბოლო ვადაა 2025 წლის 1 ნოემბერი.

2. დეკლარაცია საგადასახადო ორგანოს წარედგინება მხოლოდ ელექტრონული ფორმით (ge), გადასახადის გადამხდელის ავტორიზებული მომხმარებლის გვერდიდან.

3. წელს, უნდა წარადგინოთ 2025 წლის წლიური დეკლარაცია, ამიტომ არ შეუცვალოთ დეკლარაციას პერიოდი პორტალზე.

4. წლევანდელ დეკლარაციაში აისახება:

ა) 2025 წლის 1 აპრილის მდგომარეობით საკუთრებაში არსებული მიწა, ასევე სახელმწიფოს/მუნიციპალიტეტის საკუთრებაში არსებული ის მიწა, რომლითაც სარგებლობთ ან რომელსაც ფლობთ ამავე თარიღის მდგომარეობით;

ბ) 2024 სრული/არასრული წლის განმავლობაში საკუთრებაში არსებული უძრავი ქონება (სახლი, ბინა, ავტოფარეხი, კომერციული ფართი), მსუბუქი ავტომობილები, იახტები (კატარღები), შვეულმფრენები, თვითმფრინავები.

5. თუ ქონება (გარდა მიწისა) 2024 წელს თქვენს საკუთრებაში იყო არასრული წლის განმავლობაში, მასზე ქონების გადასახადის გაანგარიშება ხდება 2024 წლის განმავლობაში ამ ქონების თქვენს საკუთრებაში არსებობის დროის პროპორციულად (თვეების რაოდენობას უთითებთ პორტალზე).

6. დასაბეგრ ქონებაზე საგადასახადო ვალდებულება განისაზღვრება 2024 წლის ბოლოსთვის მისი საბაზრო ღირებულების მიხედვით, ხოლო მიწაზე - 2025 წლის 1 აპრილისთვის მისი ფართობის მიხედვით (არასასოფლო მიწაზე - კვ/მ; სასოფლო მიწაზე - ჰა).